Presidenti egjiptian Abdel Fattah El-Sisi mbërriti për një vizitë në Serbi, gjatë së cilës do të bisedojë me presidentin serb Aleksandar Vuçiç dhe zyrtarë të tjerë dhe do të marrë pjesë në forumin e biznesit serbo-egjiptian.
El-Sisi është pritur nga njeriu i parë i Serbisë në aeroportin “Nikola Tesla” të Beogradit.
Pjesa zyrtare e vizitës fillon nesër para mesditës. Presidentit të parë egjiptian që erdhi në Beograd pas 35 vitesh do t’i bëhet një pritje ceremoniale para Pallatit të Serbisë, pas së cilës është planifikuar takimi me Vuçiçin dhe më pas takimi plenar i delegacioneve të dy vendeve.
Presidenti i fundit i Egjiptit që ishte në Beograd ishte Hosni Mubarak në vitin 1987, gjatë një vizite dypalëshe në ish-Jugosllavi dhe në vitin 1989, kur mori pjesë në samitin e Lëvizjes së të Paangazhuarve në Beograd.
Zyrtari i fundit egjiptian që vizitoi Serbinë ishte ministri i Jashtëm Sameh Shoukry në fund të vitit 2018, kur u takua me presidentin serb Aleksandar Vuçiç, kryeministren Ana Brnabiç dhe më pas ministrin e Jashtëm Ivica Daçiç.
Serbia trashëgoi marrëveshjet me Egjiptin për bashkëpunimin ekonomik, tregtar dhe shkencor-teknik nga koha e Jugollavisë dhe marrëveshjet për nxitjen dhe mbrojtjen e investimeve, për shmangien e taksimit të dyfishtë dhe për bashkëpunimin në kulturë, arsim dhe sport, që nga koha e Bashkimit Shtetëror të Serbisë dhe Malit të Zi. /tesheshi.com/
