Trendi i ri i futbollistëve të famshëm afrikanë me sa duket është politika. Duke shfrytëzuar famën e tyre si lojtarë në të gjithë botën, ata vetë mendojnë se mund të përmirësojnë gjërat në vendet respektive.
Lojtari më i famshëm i Senegalit, El Hadji Diouf, është ndër më të fundit sportistë që kanë bërë publike ambicjen për t’i hyrë politikës. Madje direkt e “në thela”, për të hedhur kandidaturën për president i Senegalit.
Ish-djali i keq i Liverpool, Rangers e Bolton, Sunderland e Leeds, duket se ka mbledhur mendjen, e në moshën 37-vjeçare, mendon se mund të ndryshojë gjërat në vendin e tij.
“Për dy vitet e ardhëshme di t’i dedikohem politikës. Njerëzit presin shumë nga unë, e jam gati të bëhem ushtari i rinisë së vendit tim”, është shprehur Diouf për mediat britanike.
Duke pranuar se është inspiruar nga ajo që bëri George Weah në Liberi, duke fituar mandatin presidencial, 37-vjeçari thekson se shumë njerëz në Senegal, janë gati t’i shkojnë pas. El Hadji Diouf është shpallur lojtari më i mirë senegalez i të gjitha kohërave, si edhe një nga lojtarët më të mirë afrikanë në histori. /tesheshi.com/
