Divaler Bojku, i njohur me nofkën “Leku”, u vra sot me armë zjarri në plazhin e Strugës që ishte në pronësi të tij.
Sulmi ndodhi rreth orës 16:45 në lokalin “Aqua Bluesky” që ishte gjithashtu pronë e tij.
Sipas raporteve të medias, një person i paidentifikuar ende, i është afruar duke qëlluar disa herë në drejtim të Bojkut. Autori është larguar me një motorçikletë, raportojnë mediat, duke iu referuar dëshmitarëve në vendin e ngjarjes.
Nga policia ende nuk ka një komunikatë zyrtare për ngjarjen, ndërsa pritet ngritja e grupit hetimor për zbardhjen e saj.
“Leku”, ka lindur në vitin 1959 në Veleshtë të Strugës. Ai u bë i njohur, në radhë të parë për policinë e Maqedonisë, e më vonë edhe për Interpolin dhe FBI-në, si dhe për publikun më të gjerë, për aktivitet e tij të shumta kriminale, në radhë të parë për prostitucion.
Si i ri, pas një qëndrimi në Zvicër, ku punoi në ndërtim, në vitet ’80 kthehet në Maqedoni, ku hapi klube nate, ku ofroheshin aktivitete të paligjshme, përfshirë edhe drogë.
Deri në vitin 2000, ai ka operuar me trafiqet në linjën Ballkan-Evropë, si duke çuar si klandestinë në vendet e Bashkimit Evropianë.
Me punë operative dhe me bashkëpunim të FBI-së (dega Budapest) me policitë evropiane, Bojku identifikohet, grumbullohen dëshmi për punët kriminale dhe shpallet fletarresti ndërkombëtar, shkruan Expressi.
Në shkurt të vitit 2003, ai arrestohet nga policia e Maqedonisë, ndërsa në klubet e tij zbulohen dhjetra vajza që kanë qëndruar ilegalisht në vend. Gjykata e Strugës e dënon me 6 muaj burg për mbajtje të një femre pa dëshirën e saj, gjë që në opinion pritet me habi të madhe, për shkak të dënimit të butë. Pas ankesës së prokurorisë dënimi i rritet në 3 vjet.
Më 20 qershor 2003 arratiset, ndërsa transportohej në një burg me siguri të ulët. Marshallët amerikanë vendosin një shpërblim prej 10.000 dollarë për atë që do të ndihmonte në zënien e Bojkut.
Rreth dy javë pasi ikën nga burgu i Strugës, arrestohet në Ulqin të Malit të Zi, prej nga kishte planifikuar të udhëtonte fillimisht drejt Italisë e më pas në Brazil.
Sidoqoftë, Bojku kthehet në Maqedoni ku vuan dënimin, ndërsa pas daljes nga burgu humbet pothujase çdo gjurmë.
/tesheshi.com/
