Pesëmbëdhjetë vjet më parë, më 30 dhjetor 2006, ish-presidenti i Irakut Saddam Hussein u var, tre vjet pas arrestimit dhe gjykimit të tij në një gjykatë irakiane ku u shpall fajtor për krime kundër njerëzimit dhe u dënua me vdekje.
Forcat aleate të udhëhequra nga ushtria amerikane filluan një pushtim të Irakut në vitin 2003, një operacion i quajtur “Liria e Irakut”, me pretekstin se Saddam po grumbullonte armë të shkatërrimit në masë.
U deshën më pak se një muaj për të thyer rezistencën e ushtrisë irakiane, por Sadami nuk u gjet.
Uashingtoni ofroi 25 milionë dollarë për arrestimin e tij. Rreth 600 ushtarë morën pjesë në një operacion kërkimi të quajtur “Red Dawn”, bazuar në një film antikomunist amerikan të realizuar në vitin 1984. Ishte ndoshta “gjuetia” më e madhe për një njeri në histori.
Ai u gjet më 13 dhjetor 2003, pas tetë muajsh kërkimi, sipas inteligjencës, “në një vrimë miu” pranë vendlindjes së tij, Tikrit.
“Ne e kapëm atë”, njoftoi të nesërmen në Bagdad kreu i administratës civile amerikane në Irak, Paul Bremer.
Në videon e arrestimit, lideri irakian dukej si një endacak, me fytyrën plot pickime pleshtash, mjekrën e shëmtuar dhe sytë e lodhur.
Ai u tha ushtarëve që e kapën në anglisht: “Unë jam Saddam Hussein, presidenti i Irakut dhe dua të negocioj”.
Ai nuk bëri asnjë rezistencë. Aty pranë u gjetën edhe dy kallashnikovë dhe 750 mijë dollarë cash, sipas amerikanëve.
Amerikanët ia dorëzuan autoriteteve irakiane një vit më vonë për t’u gjykuar në një gjykatë speciale të Irakut për krime kundër njerëzimit.
Gjyqi zgjati nga tetori 2005 deri në korrik 2006. Sadami sfidues, i cili kishte sfiduar legjitimitetin e gjykatës gjatë gjithë kohës, u dënua me vdekje më 5 nëntor 2006.
Xhelatët e tij e kanë regjistruar momentin e ekzekutimit me videokamerë.
“Nuk pashë asnjë shenjë frike,” tha ish-këshilltari Mufak al-Rubi, i cili ishte i pranishëm në ekzekutim.
Ai u burgos tre herë gjatë regjimit të Sadamit.
“Para ekzekutimit, ai i uroi vdekje Amerikës, vdekje Izraelit dhe iranianëve, si dhe i uroi Palestinës jetë të gjatë”, tha Al-Rubi.
Ndërsa njeriu që sundoi Irakun për më shumë se 30 vjet u shpall i vdekur, shiitët, dolën në rrugë dhe u gëzuan.
Ekzekutimi brutal, në të cilin ushtria amerikane pretendon se nuk ka marrë pjesë në asnjë mënyrë, tronditi sunitët dhe ndezi dënimin ndërkombëtar, me përjashtim të Izraelit dhe Iranit.
Një ditë pas ekzekutimit të tij, Sadami u varros në fshatin e tij të lindjes Auji, afër Tikrit, së bashku me dy djemtë e tij, Uday dhe Qusay, të cilët u vranë të njëjtën ditë në një operacion nga forcat amerikane në Mosul në korrik 2003. /tesheshi.com/
