Shërbimi i Sigurimit Shtetëror i Ukrainës (SBU) mori përgjegjësinë për vrasjen e një zyrtari të lartë ushtarak rus në Moskë të martën në mëngjes, tha një burim i SBU-së për AFP-në, ndërkohë që Rusia paralajmëroi hakmarrjen për aktin.
“Vrasja e sotme e gjeneral-kolonelit Igor Kirilov, komandantit të forcave ruse për mbrojtjen bërthamore, biologjike dhe kimike, është një operacion special i SBU-së”, tha burimi.
Dmitry Medvedev, nënkryetari i Këshillit të Sigurimit të Rusisë, tha të martën se udhëheqja e Ukrainës do të përballet me një hakmarrje të afërt për vrasjen e një gjenerali të lartë rus, njoftoi agjencia e lajmeve RIA.
“Duke kuptuar pashmangshmërinë e humbjes ushtarake, Ukraina ndërmerr sulme të neveritshme frikacake në qytete paqësore,” tha ai.
Gjenerallejtënant Igor Kirilov, i cili ishte komandanti i forcave të mbrojtjes bërthamore, biologjike dhe kimike të Rusisë, u vra jashtë një blloku apartamentesh në Moskë së bashku me një ndihmës, tha më herët të martën komisioni rus për hetimin e krimeve të rënda.
Kirilov, i cili komandon forcën e mbrojtjes bërthamore, u vra herët në mëngjes nga një bombë e fshehur në një skuter elektrik.
Gjenerallejtënant u vra përpara një ndërtese banimi në Ryazansky Prospekt, shtatë kilometra në juglindje të Kremlinit.
Fotot e postuara në kanalet ruse Telegram tregojnë hyrjen e shkatërruar të ndërtesës të mbuluar me rrënoja dhe dy trupa të shtrirë në borën e përgjakshme.
Nga burime ushtarake dhe policore mësohet se atentati mund të shpallet akt terrorist.
Një seri likuidimesh të synuara
Forcat ruse të mbrojtjes nga rrezatimi, kimik dhe biologjik, të njohura si RKhBZ, janë forca speciale që veprojnë në kushte të ndotjes nga rrezatimi, kimik dhe biologjik.
Rusia hedh poshtë akuzat e Ukrainës se përdor armë kimike në front dhe Kirilov e ka akuzuar vazhdimisht Ukrainën për shkelje të protokolleve të sigurisë bërthamore.
Kirilov ishte i martuar dhe ka dy djem.
Në tetor, Britania e Madhe vendosi sanksione ndaj Kirilov-it dhe forcave të tij për përdorimin e agjentëve të kontrollit të trazirave dhe raportet për përdorimin e agjentit toksik chlorpicrin, një agjent i luftës kimike, në front.
Sipas mediave ukrainase, prokurori i shtetit i vendit paditi Kirilov-in të hënën për përdorimin e dyshuar të armëve kimike.
Rusia akuzon Ukrainën për një seri vrasjesh me shënjestër në tokën e saj që nga fillimi i luftës në Ukrainë, duke përfshirë vrasjen në vitin 2022 të Daria Dugina-s, vajzës së ideologut kombëtar rus Alexander Dugin.
Daria Dugina u vra në një shpërthim makine bombë.
Vitin e kaluar u vranë edhe blogeri rus i luftës Vladlen Tatarsky dhe komandanti i nëndetëses ruse “Krasnodar” Stanislav Rzhitsky. /tesheshi.com/
