Nga Anila Dushi
Ka disa muaj që monumenti i Heronjve të Vigut është vendosur në rrethrrotullimin që ndan Shkodrën me Malësinë e Madhe. Kjo ndodhi si një rikthim i dinjitetit të tyre, pasi të djathtët i shkulën nga një prej shesheve kryesore të Shkodrës, për t`i degdisur diku në periferi mes plehrash.
Para disa ditësh, pikërisht më 5 maj, Ditën e Dëshmorëve, aty u vendosën kurora me lule në nderim të tyre, por ja që një gabim gjuhësor në pllakën që shërben si diçiturë e monumentit, nuk ishte korrigjuar.
Edhe pse gabimi është konstatuar me kohë nga drejtues të Komunës Rrethina, ende nuk është parë e udhës të ndërhyet për ta rregulluar.
Dhe, i vetmi shpjegim mund të jetë ai që, gabimi në vetvete është vetëm në raport me standartin letrar, pasi ashtu siç është shkruar, “Heronjët” në vend të “Heronjtë”, ajo përbën trajtë dialektore të toskërishtesh, më saktë të zonës së Labërisë.
Pra, është një lloj gabimi që mund të konvertohet në një mesazh patriotik përbashkues, sipas së cilit heronjtë e Gegnisë rrojnë dhe në zemrat e popullit të Toskërisë! /tesheshi.com/
