I pari shtetar i huaj që i bëri vizitë Donald Trump-it në Shtëpinë e Bardhë qe kryeministrja britanike. Një vizitë që tregon për marrëdhëniet e veçanta amerikano-britanike, por dhe për vlerësimin e Britanisë ndaj SHBA-së.
Po kaq kuptimplote është vizita që bën sot Theresa May në Turqi, ku do të takohet me presidentin Erdoğan e me kryeministrin Binali Yıldırım.
Një vizitë që kërkon të vërë shinat e një Britanie të pas Brexit-it, e që Turqinë e sheh si një partner të rëndësishëm.
Mes çështjeve kryesore që do të diskutojë Theresa May në Ankara me krerët më të lartë të shtetit turk janë marrëdhëniet e reja tregtare midis dy vendeve dhe siguria në plan më të gjerë.
Sipas zëdhënëse së kryeministres, “Ata do të diskutojnë një marrëdhënie të re tregtare dhe një partneritet strategjik sigurie.”
Interesante dhe domethënëse ka qenë përgjigjja e zëdhënëses kur është pyetur nëse May do ta ngrejë çështjen e të drejtave të njeriut në Turqi, posaçërisht pas përpjekjes së dështuar për grusht shteti.
Me fjalët e saj, Britania kishte shprehur mbështetjen e fuqishme për demokracinë dhe për institucionet e Turqisë pas puçit! /tesheshi.com/
