Në janar, temperaturat e ajrit arritën rekord në shumë vende të Evropës ku rekordet kombëtare u thyen në tetë vende evropiane.
Në kryeqytetin e Polonisë, Varshavë, të dielën u mat një temperaturë prej 18.9 gradë Celsius, ndërsa në Bilbao të Spanjës, merkuri në termometër u hodh në 25.1 gradë, madje 10 gradë mbi mesataren, transmeton BBC.
Moti i butë i dimrit në Evropë përkoi me një stuhi të fuqishme akulli që mbuloi pjesën më të madhe të Amerikës së Veriut në dëborë dhe akull dhe mori më shumë se 60 jetë.
Në të njëjtën kohë, në anën evropiane të Atlantikut, moti në fillim të vitit të ri ishte i këndshëm në shumë vende.
Temperaturat e ajrit në Holandë, Lihtenshtajn, Lituani, Letoni, Republikën Çeke, Poloni, Danimarkë dhe Bjellorusi thyen rekordet kombëtare dhe gjithashtu në Gjermani, Francë dhe Ukrainë u thyen rekordet e stacioneve matëse.
Në Zvicër, temperaturat arritën në 20 gradë dhe moti i ngrohtë kërcënoi sezonin në vendpushimet e skive nëpër Alpe.
Megjithatë, në Evropë nuk është nxehtë kudo, sepse në disa pjesë të Skandinavisë meteorologët parashikojnë ditë më të ftohta, me temperatura të ulëta dhe borë.
Temperaturat pritet të zbresin deri në minus 20 gradë në Moskë në fundjavën e ardhshme. /tesheshi.com/
