Ekstradimi i “financierit” të bandës së Habilajve, Nazer Seitit ka përballur më në fund, në parlament, opozitën me ministren e Drejtësisë, Etilda Gjonaj. Pas dështimit të seancës së një jave më parë, kur debatet për Seitin shkaktuan bllokim të punës së Kuvendit, opozita ka dëgjuar “mbrojtjen” që Gjonaj ka bërë nga foltorja e Parlamentit. Sipas saj, opozita nuk ka asnjë fakt ligjor që flet kundër saj në këtë çështje.
Mirëpo, deputeti demokrat, Enkelejd Alibeaj njoftoi se do të dorëzojë në prokurori kallzim penal për ministren e Drejtësisë, të cilën e akuzon për “shpërdorim detyre” lidhur me ekstradimin e Nezar Seitit.
PD pretendon se Nezar Seiti u ekstradua për të mbyllur hetimet ndaj Saimir Tahirit, pasi Seiti ishte personi që kishte pranuar të fliste. Sipas Alibeajt, ligji ndalon ekstradimin e personave që janë në hetim. Por ministrja e Drejtësisë deklaroi se ka respektuar të gjitha procedurat e rregullta ligjore.
“Nuk jam thirrur për një debat ligjor por për një motiv të mirëfilltë politik. Kërkoni një kauzë që nuk e keni. Për Seitin është ndjekur e njëjta procedurë ligjore e shumë rasteve dhe shumë viteve të mëparshme” , tha ministrja. /tesheshi.com/
