Eksportet turke në Ballkan në dhjetë muajt e parë të këtij viti janë rritur me 21.8 për qind krahasuar me të njëjtën periudhë të vitit të kaluar dhe kanë arritur në 17.29 miliardë dollarë.
Eksporti më i lartë është arritur në Rumani (5.2 miliardë dollarë), ndërsa rritja më e madhe krahasuar me të njëjtën periudhë të vitit të kaluar është shënuar në Mal të Zi.
Sipas të dhënave nga Asambleja e Eksportuesve Turk (TIM), në 10 muaj të këtij viti janë eksportuar 17 miliardë e 286 milionë dollarë në vendet e Ballkanit, përfshirë Shqipërinë, Bosnjen, Bullgarinë, Kroacinë, Mali i Zi, Kosovën Maqedoninë, Rumaninë, Serbinë, Slloveninë dhe Greqinë.
Në të njëjtën periudhë të vitit të kaluar, ky numër ishte në nivelin 14 miliardë e 188 milionë dollarë, kështu që eksportet në Ballkan janë rritur për 21.8 për qind krahasuar me vitin e kaluar.
Cilat eksporte udhëhoqën?
Eksporti më i madh në këtë periudhë drejt vendeve të Ballkanit është bërë në Rumani (5.22 miliardë dollarë), e ndjekur nga Bullgaria (3.76 miliardë dollarë), Greqia (2.38 miliardë dollarë), Serbia (1.43 miliardë dollarë) dhe Sllovenia (1.36 milion dollarë).
Eksportet në vendet e tjera të rajonit ishin më pak se një miliard dollarë: Shqipëri (836.63 milionë dollarë), Bosnje (602.47 milionë dollarë), Maqedoni e Veriut (537.75 milionë dollarë), Kosovë (520.38 milionë dollarë), Kroaci (482.64 milionë dollarë) dhe Mali i Zi ( 128.12 milionë dollarë).
Sektori i materialeve dhe produkteve kimike arriti eksportin më të madh në Ballkan.
Në këtë periudhë, sektori i materialeve dhe produkteve kimike ka eksportuar 3.12 miliardë dollarë në vendet e Ballkanit.
Ky sektor pasohet nga çeliku, industria e automobilave, metalet me ngjyra, energjia elektrike dhe elektronika. /tesheshi.com/
