Muxhahedini iranian që humbi jetën ditën kur Policia ndëhyri në kampin e tyre në Manëz, ka vdekur nga zemra.
kështu ka konkluduar mjekësia ligjore shqiptae, duke rrëzuar poshtë pretendimet e banorëve të atyshëm, opozitarë të regjimit të Teheranit, se ai vdiq nga dhuna e pretenduar policore.
Ali Mostashari ka humbur jetën për shkak të problemeve në zemër, si dhe nga agravimi i organeve të tjera jetësore, për shkak të mostrajtimit mjekësor – konkludohet nga autopsia.
Ai, 78-vjeç, humbi jetën më datë 20 qershor teksa policia shqiptare po zhvillonte një aksion në kampin e MEK.
Me gjuhë mjekësore thuhet: “Ndryshimet organore janë pasojë e sëmundjeve nga të cilat ka vuajtur viktima. Shkaku i vdekjes së shtetasit Ali Mostashari ka qenë koronaroskleroza e avancuar me mekanizmin e infarktit të freskët të muskulit të zemrës.”
Në raportin mjeko-ligjor thuhet se shenjat në trupin e viktimës janë shkaktuar nga rënia pak momente para se të ndërronte jetë.
“Dermishtjet e vërejtura në kokë, hundë dhe gjymtyrët e poshtme si edhe ekimozat e vërejtura në anën e djathtë të fytyrës me mundësinë më të madhe duhet të jenë shkaktuar si pasojë e rrëzimit në momentet e fundit të jetës.”, raporton TV Klan. /tesheshi.com/
