Përkundër një mendimi dominant në Kosovë, në publik apo qarqe politike, mbi dobinë politike por dhe ekonomike të taksës ndaj mallrave serbë, ka nga ata zëra që e kundërshtojnë këtë.
Është eksperti i ekonomisë Naim Gashi, i cili, në një intervistë për Ekonomia Online, tha se në terma ekonomikë pritshmëritë kanë qenë zhgënjyese.
“Në aspektin ekonomik, pritjet tona kanë qenë që me vendosjen e taksës do të ulet varësia e Kosovës ndaj importit dhe njëkohësisht do të zgjerohej prodhimi vendor. Në fakt, ajo çka kemi parë se sipas statistikave të doganave të Kosovës ne do ta kalojmë 3 miliardin, importi nuk është më i ulët se sa në vitin e kaluar dhe fatkeqësisht nuk kemi arrit që përmes prodhimit vendor t’i zëvendësojmë prodhimet që kanë ardhë nga Serbia. Në fakt prodhimet nga Serbia janë zëvendësuar me produktet të cilat kanë ardhë nga rajoni dhe vendet e Bashkimit Evropian”, tha Gashi.
Nga ana tjetër, ai thekson dëmin politik të taksës.
“Taksa ndaj prodhimeve të Serbisë ka përkeqësuar marrëdhëniet e Kosovës me partnerët strategjikë siç janë Shtetet e Bashkuara dhe vendet e Bashkimit Evropian dhe kjo është një fatkeqësi…”, thotë Gashi.
Ndërkohë, ai shfaqet skeptik dhe për tezën e reprocitetit të shpallur nga kryeministri në pritje Albin Kurti.
“Mendoj që nuk do të jetë e lehtë vendosja e reciprocitet për faktin se Kosova ka në zbatim Marrëveshjen e Stabilizim-Asociimit e cila e obligon zbatimin e disa masave në raport me fqinj dhe njëkohësisht jemi anëtar të CEFTA-s dhe gjithashtu edhe aty llogariten disa kufizime”, thekson Gashi. /tesheshi.com/
