Nga Redaksia
Mbi 150 pjesëtarë të njësisë elitë të policisë së Serbisë, pra të xhandarmërisë, janë grupuar në afërsi të kufirit me Kosovën me urdhër të qeverisë së Serbisë, përkatësisht të Ministrisë së Punëve të Brendshme të këtij shteti, ka njoftuar një burim konfidencial për portalin ‘tesheshi.com’.
Sipas burimit, forca të xhandarmërisë, e që janë pasuese të njësisë më famëkeqe të policisë së Serbisë, ish-njësia për Operacione Speciale, ‘JSO’ (Jedinica za Specijalne Operacije), të cilët kanë vepruar gjatë luftës në Kosovë, janë vendosur në qytezën e Ribariqit dhe në qytetin e Rashkës në Serbi.
“Baza e xhandarmërisë serbe në Ribariqi, është në objektin e ish-ushtrisë së Jugosllavisë, ndërsa një togë e kësaj njësie është e stacionuar në një barakë rreth 200 m, në afërsi të pikëkalimit kufitar G31 në Bërrnjak të Zubin Potokut”, ka njoftuar burimi.
“Kjo njësi e xhandarmërisë serbe në këtë pjesë kontrollon kufirin tokësor si dhe atë ujor në Liqenin e Gazivodës, ndërsa në anën e Leposaviqit, pra në pikëkalim kufitar G 1 në Jarinje të Leposaviqit, kjo njësi gjithashtu kontrollon kufirin si dhe rrugët ilegale që të shpien nga Serbia në Kosovë dhe anasjellas”, saktëson më tej burimi.
Sipas tij, në pjesën e Leposaviqit, xhandarmëria serbe është vendosur në qytetin e Rashkës në një objekt po të ish-ushtrisë Jugosllave.
“Forcat e xhandarmërisë serbe, kohë pas kohë me rroba civile por edhe me uniforma, hyjnë në territorin e Kosovës të papenguara”, ka thënë burimi dhe ka shtuar se: “kjo njësi është mirë e pajisur me mjete luftarake duke filluar nga armët, makinat, motoskaf për liqen si dhe pajisjet për përgjim dhe vëzhgim, si dhe ato termike për përcjellje të kufirit gjatë natës”.
Pjesëtarët e xhandarmërisë serbe shumë shpesh shihen në Kosovë me makinat e tyre, në rroba civile poshtë të cilave bartin armë, e sidomos shihen gjatë protestave të serbëve të veriut, si dhe kanë qenë pjesëmarrës edhe në vendosjen e barrikadave në rrugët e veriut të Kosovës, gjatë vitit 2011, vijon të thotë burimi i portalit ‘tesheshi.com’.
Burimi ka specifikuar se rasti më flagrant i ndërhyrjes në seri të xhandarmërisë në territorin e Kosovës është pengmarrja e Sllavoljub Joviçit -Pagi, në oborrin e Spitalit në veri të Mitrovicës në pikë të ditës dhe transportimi i tij në Serbi, rast ky për të cilin është heshtur nga Policia e Kosovës, KFOR-i dhe EULEX-i.
Në këtë njësi të xhandarmërisë së Serbisë, ka një numër pjesëtarësh- serbë të Kosovës. “Mbi 20 pjesëtarë të xhandarmërisë të Serbisë janë serbë të Kosovës, që jetojnë me familjet e tyre në Kosovë, ndërsa punojnë në këtë njësi të policisë speciale të Serbisë, ka thënë burimi.
Sipas tij, xhandarët serbë, pas kryerjes së detyrës në pjesën serbe, kalojnë në Kosovë përmes pikëkalimeve kufitare të papenguar, edhe pse njihen me policët e Kosovës, ata kalojnë shumë mirë me njëri-tjetrin. Portali ‘tesheshi’ ka siguruar disa foto të xhandarëve serbë nga baza e tyre në Ribariq si dhe gjatë kontrollit të kufirit me Kosovën.
Zyrtarë të policisë së Kosovës nuk kanë dashur të prononcohen për portalin ‘tesheshi’, në lidhje me hyrjen e xhandarmëri Serbe në territorin e Kosovës, kohë pas kohe.
JSO njihet në opinionin kosovar dhe atë botëror si policia më kriminale që ka ekzistuar, pasi edhe themeluesit e saj, janë ish-kriminelët Zhelko Razhnatoviç- Arkani, kapiten Dragan dhe Milorad Ulmenik- Llegija.
Ndërsa pas vrasjes të kryeministrit të Serbisë, të ndjerit Zoran Gjingjiq, në fillim të vitit 2003, kjo njësi është shpërndarë dhe rreth 60 përqind e pjesëtarëve të saj kanë kaluar në njësinë e re të quajtur xhandarmëria e Serbisë.
/tesheshi.com/
