Nga Redaksia
Po bëhen tash e 6 ditë që një kamion i ngarkuar me pije alkoolike dhe i futur kontrabandë nga Serbia, qëndron i parkuar në afërsi të tri ndërtesave në veri të Mitrovicës, pikërisht në oborrin e bodrumit të pijeve të pronarit Boban Bishevac.
Kamioni është duke u ruajtur nga Policia e Kosovës, ndërsa shoferi ja ka mbathur, është arratisur. Por policia nuk po guxon që, këtë kamion të marrë e ta çojë në terminalin doganor.
“Një kamion me mallra që është ndaluar nga policia kufitare dhe doganat e Kosovës është duke qëndruar në afërsi të tri ndërtesave, si duket kamioni është prishur dhe policia nuk po mundet ta dërgoj në terminalin doganor në jug të Mitrovicë”, ka thënë zëvendësdrejtori i Policisë së Kosovës për rajonin Veri, Besim Hoti.
Hoti ka shtuar se nuk ka më shumë detaje rreth këtij rasti, pasi sipas tij, kjo është kompetencë e Policisë Kufitare e cila është duke e ruajtur kamionin.
Sipas një burimi konfidencial, kamioni i ngarkuar me mallra kontrabandë është futur në Kosovë përmes rrugës ilegale nëpër fshatin Tresavë të Leposaviqit. Kamioni është ndaluar në Mitrovicë dhe sipas të gjitha gjasave, bëhet fjalë për struktura policore të korruptuara, të cila për 65 km rrugë magjistrale nuk e kanë ndaluar kamionin me mall kontrabandë.
“Si ka qenë e munduar që një kamion me mallra kontrabandë të lëvizë nëpër këtë magjistrale dhe të mos ndalohet nga Policia e Kosovës në Veri”, i ka deklaruar burimi në një bisedë me redaksinë e portalit tesheshi.com në Mitrovicë.
Madje sipas tij, kamioni i Bishevcit nuk është i prishur, por policia nuk guxon ta dërgojë në terminalin doganor në jug të Mitrovicës deri sa nga kamioni të merret sasia e pijeve alkoolike që është në të, nga ata që e presin këtë sasi të futur kontrabandë, kapot serbë.
Kamioni, sqaron ai, përveçse ruhet nga policët, ai ruhet edhe kontrabandistë dhe pjesëtarë të krimit të organizuar në Veri, duke mos lejuar policinë e Kosovës që ta dërgojë në terminalin doganor.
Sakaq, zyrtarë të Policisë së Kosovës në veri të Mitrovicës i kanë thënë portalit tesheshi.com se kanië hetimet lidhur me policët të cilët kanë qenë në patrullim përgjatë magjistrales Leposaviq- Mitrovicë, pasi vërtet është e habitshme që një kamion të kalojë tri patrulla policore e të mos ndalohet prej tyre. /tesheshi.com/
