Nga Bashkim Kastriati
Të premten, senati i Universitetit të Prishtinës (UP) ka zgjedhur pesë anëtarët e Këshillit Drejtues. Këta anëtarë janë: Alberta Troni, Fevzi Berisha, Kemal Bislimi, Beqir Sadikaj dhe Zeqir Veselaj. Të gjithë këta u zgjodhën që në rundin e parë.
Por nuk ka befasi e as ndryshime nga “rregulli” i pashkruar tash e sa vite. Tesheshi.com ka bërë një hulumtim në lidhje me lidhjet e këtyre anëtarëve me partitë politike dhe ka rezultuar se të gjithë këta të zgjedhur janë të lidhur me parti politike, të cilat nuk po e lëshojnë që një kohë të gjatë Universitetin e Prishtinës, por as universitetet tjera publike.
Ja lidhjet e anëtarëve të Këshillit Drejtues me partitë politike:
Alberta Troni (LDK), është Profesorësh e Asocuar në degën e Muzikës në Fakultetin e Arteve. Ka qenë kandidate e LDK-së për deputete në zgjedhjet parlamentare të vitit 2010, por nuk ka arritur të jetë deputete. Gjithashtu ka qenë këshilltare e ministrit të kulturës Valton Beqiri në vitin 2010, i cili ka qenë ministër nga radhët e LDK-së. Alberta Troni gjithashtu ka qenë edhe prodekane në Fakultetin e Artit dhe është emëruar në këtë post me 10/1/2012. Ajo është nga Prishtina.
Fevzi Berisha (LDK), është Profesor i Rregullt në Fakultetin e Ndërtimtarisë dhe Arkitekturës. Ai është anëtar i 63 i këshillit të përgjithshëm të LDK-së. Ka qenë kandidat për deputet në zgjedhjet parlamentare në vitin 2010.
Beqir Sadikaj (PDK), është profesor në Fakultetin Juridik. Ka qenë që një kohë të gjatë pjesë e strukturave të PDK-së. Ishte kandidat për deputet në zgjedhjet e vitit 2014 nga radhët e PDK-së.
Kemajl Bislimi (PDK), është Profesor i Asocuar në departamentin e Biologjisë në Fakultetin e Shkencave Matematike-Natyrore. Në web-faqen e PDK-së ai figuron si anëtar i kryesisë së degës së PDK-së, në Ferizaj.
Zeqir Veselaj, është Profesor i Asocuar në Fakultetin e Edukimit. Ka qenë këshilltar i ministrit Ethem Çeku në Mistrinë e Mjedisit dhe Planifikimit Hapësinor. Ai u emërua prodekan më 12/28/2010. Këtë post e mori kur ish-shefi i tij Ethem Çeku mori postin e dekanit. Është nga Komuna e Klinës. Ethem Çeku këtë muaj është zgjedhur sërish dekan në Fakultetin e Edukimit. Ai ka qenë ndër krerët e Aleancës për Ardhmërinë e Kosovës (AAK), ka qenë edhe deputet nga radhët e AAK-së, por në vitin 2012 ka dhënë dorëheqje nga kjo parti.
Zgjedhja e këtyre anëtarëve të Këshillit Drejtues të UP-së, është kundërshtuar nga shoqëria civile dhe njohësit e fushës së arsimit, duke e quajtur si të dëmshëm dhe vazhdim të kapjes së Universitetit të Prishtinës.
Katër nga të lartcekurit patën votuar për shkarkimin e rektorit aktual Ramadan Zejnullahu., ndërsa kryetarja Shefkije Islamaj u shkarkua pikërisht për shkelje ligjore të procedurave gjatë shkarkimit të Zejnullahut, nga ministri Arsim Bajrami. Rektori Zejnullahu ishte kthyer në këtë post pasi ishin gjetur shkelje procedurale, por këtij rikthimi i parapriu një mobilizim i shoqërisë civile dhe komunitetit ndërkombëtar të akredituar në Kosovë. Ndër ta më i zëshmi ishte Samuel Zhbogar, shef i zyrës së BE-së në Kosovë.
Të hënën hapet konkursi për rektor të UP-së dhe do të varët nga ky grup partiak, por edhe i atyre që janë emëruar nga ministri i Arsimit Shkencës dhe Teknologjisë Arsim Bajrami. Pra rektori i ri pritet të jetë me prapavijë politike dhe nuk ka asnjë shpresë për vitet e ardhshme se UP-ja do të dalë nga kthetrat e partive politike që janë në pushtet.
Ndërkohë, sot, Ministri i Arsimit, Shkencës dhe Teknologjisë, Arsim Bajrami, në bazë të dispozitave të nenit 18 të Ligjit për Arsimin e Lartë në Republikën e Kosovës, ka emëruar katër anëtarët e Këshillit Drejtues të Universitetit të Prishtinës “Hasan Prishtina”.
Anëtarët e emëruar të Këshillit Drejtues të Universitetit të Prishtinës “Hasan Prishtina” janë: Ismet Salihu, Alajdin Abazi, Sigurd Hollinger, Ahmet Latifi. /tesheshi.com/
