Nga redaksia
Shteti serb, përkatësisht qeveria e Beogradit e cila këto ditë është ndjerë keq nga pezullimi i Zajednicës në Kushtetuesen e Kosovës, e që për këtë po quan besëprerë qeverinë e Prishtinës nëpër diplomacitë europiane, vetë nuk respekton asnjë marrëveshje.
Si provë e kësaj mund të sillet ajo që po ndodh në veri të Kosovës, ku qeveria serbe vazhdon ende financimin dhe riorganizimin e strukturave paralele, siç flasim dokumentacionet që ka siguruar portali tesheshi.com.
Redaksia e tesheshi.com, ka arritur të sigurojë një dokument ku në shkruhet: “Republika Serbija, Skupstina opstine –Kosovska Mitrovica- Odelenje za urbanizam gradevinsko i stambene poslove”- “Republika e Serbisë – Kuvendi Komunal i Mitrovicës së Kosovës- njësia për Urbanizëm, ndërtimtari dhe ndërtesave afariste të lëshuar me datë 26. 10. 1015, nr 353-73.
Dokumenti është nënshkruar nga Dragan Spasojeviq (Spaski), i cili punon si shefi i sektorit të Urbanizmit në komunën e Mitrovicës së veriut e cila financohet nga buxheti i qeverisë së Kosovës.
Pra, zyrtarë serbë të komunës së Veriut, me bekimin e qeverisë serbe ende po punojnë me dy arshiva, edhe pse me Marrëveshjen e Brukselit të vitit 2013, këto struktura komunale paralele të Serbisë duhet që të përfundonin funksionimin e tyre në Kosovë. Por mbi të gjitha, në kokën e dokumentit, veri i Kosovës konsiderohet zyrtarisht Serbi.
Në këtë dokument bëhet fjalë për një kërkesë që ka bërë një qytetar serb i veriut të Mitrovicës për rrënimin dhe ndërtimin e një objekti të ri në rrugën “Ivo Llolla Ribar” në afërsi të spitalit të fëmijëve.
Gjithashtu, qeveria e Serbisë, ditë më parë ka emëruar edhe një komandanti e ri të policisë së Serbisë për Veriun e Kosovës, sipas të dhënave që ka siguruar tesheshi.com.
Bëhet fjalë për kolonelin Sasha Arsenijeviq, i cili ka zëvëndësuar Dragolub Radoviqin, të dalë në pension.
Një burim konfidencial informon se kolonel Arsenijeviq e ka zyrën e tij në një ndërtesë të quajtur ‘Neoplantu”, në qytetin e Kralevës së Serbisë, dhe, në bazë të urdhrave të lëshuar nga kjo drejtori e policisë serbe, të gjithë komandantët e 4 stacioneve të policisë së Kosovës në Veri, janë të detyruar që t`i raportojnë Arsenijeviqit në Kralevë.
Po ashtu, aktive në veri të Mitrovicës dhe Kosovës është edhe e ashtuquajtura Civilna Zastita– Mbrojtja Civile serbe, e cila dhe është parë duke festuar ditën kur Kosova nuk është pranuar në UNESKO, ka thënë burimi portalit tesheshi.com, me kusht të anonimitetit. /tesheshi.com/
