Një mur i ngritur në anën serbe të Ibrit në veri të Mitrovicës, ka tronditur jo pak opinionin kosovar. Ndodh kjo teksa ishte premtuar, dhe dukej sikur po realizohej në terren, bashkimi qytetit të ndarë që pas lufte. Madje u arrit deri atje sa të pëmendeshin dhe armët, siç ndodhi me veteranët e Drenicës.
Por ministrja për Dialog, Edita Tahiri tenton t’i qetësojë gjakrat duke premtuar se muri serb do shembet në pak ditë, edhe pse nuk jep një datë të saktë.
Sipas saj, muret janë kundërshtim me parimet për lëvizjen e lirë dhe në kundërshtim me ligjet e Kosovës dhe marrëveshjen e Brukselit.
Ministrja Tahiri, në një intervistë për tesheshi.com u jep përgjigje ndër të tjera edhe zërave politikë që kërkojnë dorëheqjen e saj apo një interpelancë me të në Kuvend….
Intervistoi: Blendi Gashi
Dje keni zhvilluar një takim me Bashkimin Evropian dhe drejtuesit e Mitrovicës Veriore për çështjen e murit të ngitur nga serbët në veri. A ështe pajtuar BE që muri të rrënohet tërësisht apo vetëm gjysma e tij ?
Çështja e shkeljes së marrëveshjes së Brukselit është biseduar gjerësisht me Bashkimin Evropian, gjatë ditë dy ditëve fundit Në bisedimet që patëm me Bashkimin Evropian, këtu në Prishtinë, në emër të qeverisë së Kosovës kam kërkuar zbatimin e plotë të marrëveshjes për revitalizimin e Urës së Ibrit në Mitrovicë si dhe eliminimin e menjëhershëm të shkeljeve të bëra nga një mur ilegal. Po ashtu diskutuam edhe pjesën tjetër të marrëveshjes që lidhet me revitalizimin e rrugës kryesore të komunës veriore të Mitrovicës, e cila do të shëndërrohet në rrugë për këmbësor, sipas Marrëveshjes së Brukselit.
Me Bashkimin Evropian u dakorduam se marrëveshja e Brukselit, për revitalizimin e urës të datës 25 gusht 2015 do të respektohet plotësisht dhe se revitalizimi i urës dhe revitalizimin i rrugës për këmbësor në pjesën veriore të qytetit të Mitrovicës do të jenë në pajtim me parimet e lëvizjes së lirë. Kjo do të thotë se nuk do të ketë mur në pjesën që lidh urën e Ibrit me rrugën për këmbësor në veri të qytetit, sepse muri është në kundërshtim me marrëveshjen e Brukselit.
Prandaj ju siguroj se nuk do të ketë mur, sepse muret janë në kundërshtim me parimet për lëvizjen e lirë dhe në kundërshtim me ligjet e Kosovës dhe siç e thash marrëveshjen e Brukselit.
Muri nuk ka dimenzione ose është mur ose nuk është, dhe ju them që në do të ketë mur. Mirëpo problemi kryesor këtu është se Serbia që ka ende mure në kokën e saj, prandaj e shkeli marrëveshjen e Brukselit duke udhëzuar një grup serbësh që ndërtojnë këtë mur ilegal, që do të hiqet.
Çka nëse nuk rrënohet komplet?
Marrëveshja e Brukselit do të zbatohet me përpikëri dhe nuk do të ket mur.
A mund të na thoni pra kur pritet rrënohet muri?
Ju siguroj se edhe ky mur do të hiqet në ditët në vijim dhe gjithë do shohim së bashku se nuk do të ketë mur e as pengesa të çfarëdoshme për lëvizjen e lirë. Do të hiqet brenda ditësh.
Kreu i Mitrovicës Veriore, Goran Rakiq, po insiston tek muri të bëhen shkallë dhe një lloj shetitoreje. Ç’përgjigje keni ju si ministre ?
Të gjithë e dinë, por edhe vet ai (Rakiq) e di se çfarë thotë marrëveshja e Brukselit, e cila garantohet nga BE dhe partnerët ndërkombëtarë, dhe e cila do të zbatohet me përpikëri pa mure por duke siguruar lëvizjen e lirë. Çështja e rrugës këmbësor është pjesë e marrëveshjes së Brukselit.
A keni qenë e informuar se do ndërtohet një mur i tillë, pasi në media po qarkullojnë shkrime se politika kosovare ka qenë në dijeni?
Siç ju thash ky është një mur ilegal dhe kur gjërat bëhen ilegalisht nuk mund të dihen më parë. Nuk e ka ditur as qeveri, as unë si kryenegociatore dhe as Bashkimi Evropian.Në atë pjesë kanë qenë duke u zhvilluar punime për revitalzimin e rrugës për këmbësor sipas marrëveshjes së Brukselit dhe është shfaqur ky mur ilegal.
Ju përkujtojmë se përvoja të tilla negative që i ka krijuar Serbia i kemi pasur edhe me rastin e heqjes së barrikadës nga ura e Ibrit, kur një barrikadë u hoq dhe tjetra u vu si një “park paqe” të cilën e hoqëm tërësisht. Dhe ju jeni të gjithë dëshmitar se tashmë ura e Ibrit është urë e lirë dhe bashkuese.
Ftoj qytetarët dhe opinionin publik në Kosovë, Shqipëri dhe gjithandej ku janë shqiptarët të jenë të përmbajtur dhe të kenë durim sepse ky problem do të zgjidhet, është çështje ditësh kur gjërat do të shkojnë në vend ashtu siç jemi dakorduar me BE-në dhe në në pajtim të plotë me marrëveshjen e Brukselit.
AAK po kërkon mbajtjen e një interpelance për këtë çështje. A jeni të gatshme të raportoni para ligjvënësve? Po, zërat opozitar për dorëheqjen tuaj dhe të kryeministrit si i shihni?
Nuk do të ketë nevojë për interpelancë e as për dorëheqje, sepse do të jeni dëshmitarë se muri do të hiqet para se të vjen koha për një gjë të tillë në Kuvendin e Kosovës. /tesheshi.com/
