Nga Mensur Krasniqi
Megjithëse u bën 2 vite e gjysmë nga vuajtja e dënimit me burg të përjetshëm të 5 shqiptarëve që akuzoheshin pafajësisht për vrasje të pesëfishtë të të rinjve në Liqenin e Smillkovës, askush nga politikanët shqiptarë në pushtet nuk po e ngre zërin.
Andaj mërgimtarët e disaporës kanë marrë iniciativë për peticion kundër rastit Monstra. Këtë peticion sipas Hadi Osmanit, njërit ndër organizatorët e kësaj nisme, tanimë e kanë dorëzuar në parlamentin e Zvicrës. Ai në vazhdim për tesheshi.com ka dhënë një deklaratë ku thotë: “Atë që s’e bën politika shqiptare në Shkup, mundohemi t’a bëjmë këtu në mërgim ne. Është po ajo politikë na ftonte të mbjellin kastravecë në vendlindje e të ruajmë dele. S’ka rëndësi, shpresojmë që t’ia arrijmë qëllimit me ndihmën e Zotit dhe drejtësisë.”
Ndërkaq, sipas prijësit të këtij organizimi, Florim Kadriu, peticioni kundër rastit Monstra ndaj qeverisë federale të Zvicrës është shqyrtuar nga Ministria e Jashtme e Konfederatës Zvicerane dhe në përgjigjen zyrtare të Ministrisë, ministri Didier Burkhalter ka theksuar se peticioni është marrë në konsideratë, se Zvicra në shkallë politike angazhohet për të drejtat dhe detyrat e qytetarëve dhe posaçërisht për të drejtat e komuniteteve minoritare.
“Berna zyrtare ka nënvizuar qëndrimin se shteti zviceran nuk ka marrë pjesë në financimin e projektit Skopje 2014 dhe nuk do të marrë edhe në të ardhmen pjesë në projekte të tilla. Ministri zotohet për një angazhim të vazhdueshëm për ta përmirësuar gjendjen politike dhe për ta avancuar demokracinë në Maqedoni. Ministri, përgjigjes i ka bashkangjitur raportin e Këshillit për të Drejtat e Njeriut të Kombeve të Bashkuara, ku gjatë sesioneve të këtij këshilli, diplomacia e Zvicrës në katër rekomandime për 2014 nga institucionet dhe qeveria maqedonase kërkon: Rekomandim 101.6: Ndaloni gjitha keqtrajtimet, veçanërisht në burgje dhe përmirësoni kushtet e paraburgimit, duke respektuar detyrimet sipas konventës kundër torturës, trajtimit çnjerëzor dhe protokollit të tij opsional. Rekomandim 101.36: Menjëherë shtoni përpjekjet për të eliminuar të gjitha format e diskriminimit në bazë të përkatësisë etnike, fesë, gjinisë dhe orientimit seksual. Rekomandim 101.62: Siguroni të ketë një respektim të strikt të ndarjes së pushteteve dhe ligjet të mos zbatohen në mënyrë selektive. Rekomandim 101.84: Të sigurohet që legjislacioni i ri në lidhje me mediat të aplikohet në mënyrë të tillë që pavarësia dhe pluralizmi i medias nuk është i dëmtuar”, thuhet në kumtesën e mërgatës shqiptare dedikuar mbrojtjes së të drejtave shqiptare në Maqedoni, gjegjësisht të burgosurve të pafajshëm në rastin Monstra.
Mërgata siguron që si këshill do të luftojnë për drejtësi jo vetëm për të burgosurit të rastit Monstra, por dhe për krejt të burgosurit të dënuar padrejtësisht, duke falenderuar Konfederatën Zvicerane dhe përfaqësuesin e sajë z. Didier Burkhalter për angazhimin e tij rreth çështjes sonë. Njëkohësisht ata kërkojnë nga Zvicra, por dhe nga çdo shtet demokratik, që të angazhohen me një përqëndrim ende më të madh për të arritur rimëkëmbjen e institucioneve gjyqësore dhe lirimin e të pafajshmëve në Maqedoni. /tesheshi.com/
