Nga Mensur Krasniqi
Arta Tahiri, moderatorja e emisionit Rruga drejt në Alsat-m, është shndërruar në personazhin kryesor këto ditë në Maqedoni. Ajo mbrojti gjuhën shqipe duke përzënë nga emisioni mysafirin e Manifestit Maqedonas, Stefan Vllahov Micev, organizatë kjo që njihet si mbrojtëse e politikave të kryeministrit dhe qeverisë së VMRO-DPMNE-së. Me të filluar emisioni ku si mysafir ishin të ftuar edhe deputetja nga rradhët e BDI-së, Ermira Mehmeti dhe aktivisti politik Nikolla Gelevski, ishte ai maqedonasi Micev që ngriti zërin kundër gjuhës shqipe, duke kërkuar nga Tahiri të drejtonte emisionin në gjuhën maqedonase.
Por gazetarja Tahiri me fjalët: ” Nëse nuk ju pëlqen mënyra se si ne këtu do të debatojmë, urdhëroni mund të lëshoni studion”. Kjo deklaratë Tahirin e vuri në fokus të debatit në media por edhe në rrjetet e ndryshme sociale, e sidomos në Facebook. Puna ka shkuar deri atje sa Arta Tahiri të krahasohet me heroinën kombëtare, Shote Galica. Madje në mbështetje të saj u krijua edhe Fan Page në Facebook “Me Arta Tahirin”.
tesheshi.com kontaktoi moderatoren, ku prej saj morri këtë prononcim:
“Në emisionin Rruga drejt ishte planifikuar të jetë i ftuar kryeminstri Nikolla Gruevski, por duke pasur parasysh që ai preferon të merr pjesë vetëm në televizione proqeveritare që e lavdërojnë vazhdimisht atë, nuk erdhi në emision. Edhe pse nuk pranoi ftesën, dhe duke marrë parasysh që Rruga drejt synon të jetë forum përballjesh partiake dhe politike, përveç deputetes së BDI-së, Ermira Mehmeti, e cila njihet si kundërshtare deklarative e Gruevskit, ftuam edhe aktivistin politik, Nikolla Gelevski dhe përfaqësuesin e Manifestit Maqedonas, Stefan Vllahov Micev, organizatë kjo që njihet si mbrojtëse e politikave të kryeministrit dhe qeverisë së VMRO-DPMNE-së. Në momentin kur e ka quajtur gjuhën shqipe të huaj, unë kam kërkuar ta lëshojë studion sepse nuk toleroj fyerje të tilla.
Ndryshe, mendoj se maqedonasit duhet të mësojnë të dëgjojnë shqipen. Derisa unë do ta drejtoj emisionin, moderimi do të jetë vetëm në gjuhën shqipe, ndërsa të ftuarit maqedonas do të mund të shprehen në maqedonisht dhe do të përkthehen në shqip dhe anasjelltas, me qëllim që të dëgjohen e shihen mendimet dhe pikëpamjet, qofshin edhe ato më kontradiktore në shoqërinë e vendit.
Në këtë funksion ishte edhe ftesa ndaj Micovit, sepse mendoj se është më mirë të dihet se ka struktura të tilla maqedonase të cilave u pengon gjithçka që është shqiptare, sesa ato të injorohen, të konsiderohen si joekzistentë, sepse shoqëria maqedonase ka shumë bashkëmendimtarë të Micovit. Publiku shqiptar dhe ai maqedonas duhet ta dijnë këtë.
Unë ndjej obligim moral dhe profesional t’i falenderoj të gjithë shqiptarët, që në forma të ndryshme kanë shprehur mbështetjen ndaj meje, duke u dhënë një premtim se Rruga drejt do të vazhdojë të sjellë përballje të reja politike ndërshqiptare, por edhe në kontekst më të gjerë,me qëllim që të vijë në shprehje cilësia. Nuk mendoj se kam bërë ndonjë akt trimërie, por kam kryer vetëm detyrën time profesionale. Secili duhet të mbrojë gjuhën shqipe aty ku është, në politikë, në institucione, në media, në shoqëri e kështu me radhë. Duke mbrojtur gjuhën shqipe dhe duke tentuar ta avancojmë atë, nuk bëjmë asnjë gjë ndaj tjerëve, sepse për ta njohur tjetrin, duhet ta njohësh vetveten.
Në ato momente, kam menduar se si në shekullin XXI mund të ketë mendje të errësuara, të cilëve mund tu pengojë komunikimi në gjuhën shqipe, edhe pse tjetrit i mundësohet të thotë mendimin e tij në gjuhën amtare. Por e vërteta është se të tillë si Micovi ka shumë dhe Maqedonia duhet të gjejë modelin për të tejkaluar barrierat. Micov është ndoshta ekzemplar i keq, që u shfaq publikisht, por si Micovi ka edhe shumë politikanë maqedonas, që nuk flasin me gjuhën e tij, nuk shprehen kaq negativisht ndaj gjuhës shqipe, por me vepra e bëjnë thuajse të njëjtën. Barazia e shqiptarëve në shtet fillon nga gjuha dhe qytetarët maqedonas duhet të mësojnë të dëgjojnë dhe të mësojnë shqipen, pse jo.
Po, i ftuari ka qenë i njoftuar se pyetjet do ti bëhen në shqip dhe se do të ketë përkthim në maqedonisht, por si duket ka urrejtje patologjike ndaj gjuhës shqipe dhe ky është një problem i tij.”
/tesheshi.com/
