Këto kohë të nxehta vere janë dhe muaj provimesh, ku nëpër auditore universitetesh studentë kokëulur hedhin në letër gjithë ç’ka kanë nxënë, varësisht nga tezat që u kanë rënë. Por disa sosh kanë shqyer sytë kur para tyre janë ballafaquar me pyetje krejt të pazakonta, provokuese për etikën dhe inteligjencën e tyre.
Në një provim zyrtar në lëndën “Historia e Mendimit Ekonomik”, pedagogu i lëndës u ka ofruar studentëve, qartazi pyetje me sens të fortë humori, por pa u kuptuar se për çfarë arsye.
Tesheshi.com ka siguruar tezat e provimit ku figurojnë ato, të tilla si: “Ekonomia si shkencë u zhvillua nga idetë e Jozefina Topallit?”, apo “Adam Smith ishte pjesëtar i Lëvizjes Socialiste për Integrim?”, “Sipas Aristotelit, inagurimi i sheshit Skënderbej ia shton meritat Erjonkës?”, “Ekonomia politike lindi nga institimi i Edi Ramës për reformën në drejtësi?”, “Platoni mbështeste idetë e PDIU-së?”, për të vajtur tek pyetje më pa kuptim dhe që është qershia mbi tortë: “Shën Agustini kishte një tatuazh me fytyrën e Sali Berishës në krahun e djathtë?”.
Po të vësh re me kujdes, këto pyetje janë një nga 10 alternativat që studenti duhet të zgjedhë si përgjigje të saktë, dhe 9 alternativat e tjera janë të rregullta në përshtatje me atë që ofron lënda e “Mendimit Ekonomik”.
Kjo të bën të besosh se pedagogu ose ka pasur thjesht qëllim të bëjë humor, ose ka dashur të zbulojë “idiotët” e klasës nëse ndonjëri prej tyre do të rrethonte si përgjigje të saktë alternativat e çuditshme.
Këto teza janë shpërndarë në një nga universitetet shtetërore të rretheve që i ka kaluar testit të ligjshmërisë dhe reformës së akreditimit që bëri Ministria e Arsimit në Arsimin e Lartë.
Dhe kjo e shton akoma më shumë absurdin e përbërjes së tezave.
Sepse, sido që të jetë, në to ka emra personash konkret, për më tepër figurash publike, të cilët janë shfryëzuar si “lëndë e parë” e një përtalljeje për çdo mendje me nivel mesatar inteligjence.
Mjaft të thuhet se çdokush prej tyre, shumë me tepër Erjon Veliaj i shndërruar në “Erjonkë”, ka të drejtë të hedhë në gjyq pegadogun që i ka hartuar ato apo instancat zyrtare shtetërore që i kanë “ok” paçavureve të tilla, në një terren akademik ku kërkohet maksimumi i seriozitetit në respekt në dijes. /tesheshi.com/
