Kryeministri Rama e ka ripërsëritur guximshëm parashikimin që sipas tij, tre vitet e ardhshme ekonomia shqiptare mund të ketë një rritje deri në 6 përqind; duke paralajmëruar në këtë mënyrë rikthimin e epokës së artë “Nano”, ku ish-kryesocialisti dhe njëherësh kryeministër, arriti të kapte shifra deri në 7 përqind të rritjes ekonomike.
Megjithatë, kjo jo aq shumë për meritë të tij se sa të kohës kur ai qeverisi, ku u shënua një rritje e ndjeshme e remitancave të emigrantëve, që përbënte dhe një ndër bazat e të ardhurave në ekonominë e vendit, por dhe çeljes së shtegut të pastrimit të parasë nëpërmjet ndërtimeve.
Ndërsa Rama e bazon rritjen tek ajo që sërish e potencoi, në një plan investimesh prej afro 1 miliard euro.
“Ne kemi një plan investimesh prej 1 miliard euro në 3 vitet e ardhshme. Këto investime mund të nxisin rritjen ekonomike në mbi 6 për qind. Ky program agresiv investimesh do të shpallet në ditët e para të janarit”, tha Rama në ceremoninë e ndarjes së çmimeve “Bleta e Artë”, ku sipas tij tashmë Shqipëria ka një model ekonomie që mbështetet tek eksportet dhe burimet prodhuese. /tesheshi.com/
