Ekonomia e Japonisë hyri në një recesion në tremujorin e parë të këtij viti, pasi pandemia e virusit koronar ndaloi prodhimin, eksportet dhe konsumin, si dhe shtoi frikën se mund të ndodhin edhe periudha edhe më të vështira.
Qeveria japoneze raportoi se prodhimi i brendshëm bruto ra në terma realë në periudhën janar-mars me 3.4 përqind në bazë vjetore, sipas të dhënave të rregulluara sezonale.
Në bazë tremujore, rënia ishte 0.9 përqind, raportoi CNBC.
Eksportet u mbytën 21.8 përqind, investimet private në banesa me gati 17 përqind dhe konsumi i familjeve me 3.1 përqind.
Analistët presin që situata të përkeqësohet sepse, thonë ata, ekonomia e tretë më e madhe botërore po përballet me sfidën më të madhe që nga Lufta e Dytë Botërore.
Japonia është në një recesion teknik, i cili me përkufizim ndodh kur ekonomia bie për dy tremujorë radhazi, pasi tashmë ka regjistruar një rënie prej 1.9 përqind në tremujorin Tetor-Dhjetor.
Japonia është jashtëzakonisht e ndjeshme ndaj pasojave të pandemisë, duke pasur parasysh varësinë e saj nga tregtia me Shtetet e Bashkuara dhe Kinën.
Udhëtimi, turizmi dhe tregtia me këto dhe vendet e tjera janë shembur për shkak të masave të bllokadës që synojnë luftimin e sëmundjes COVID-19.
Qeveria ka miratuar një paketë masash mbështetëse me vlerë afro 108,000 miliardë jen (1.000 miliardë dollarë), dhe planifikon të mbledhë edhe më shumë fonde, përfshirë ndihmën për bizneset e vogla dhe pagesën e ndihmës financiare për qytetarët.
Të paktën 16,000 njerëz në Japoni janë infektuar dhe më shumë se 700 kanë vdekur, që është një numër relativisht i vogël duke marrë parasysh që vendi ka popullsinë më të vjetër në botë dhe se qytetet e tij janë të populluara dendur.
Japonia lehtësoi masat e urgjencës në pjesën më të madhe të vendit javën e kaluar, por kufizime të caktuara janë mbajtur në qytete që janë vatër e epidemisë, siç është Tokio. /tesheshi.com/
