Nga Blendi Gashi
Presidenti Thaçi nesër do të ulet sërish në tavolinë me homologun serb Aleksander Vuçiç në përpjekje për të çuar përpara dialogun midis Prishtinës dhe Beogradit. Konkretisht ata do të bisedojnë për zbatimin e marrëveshjeve të arritura deri më tani, por edhe si të shkohet drejt një marrëveshje të përgjithshme që do të sjellë pajtim me dy shtetesh.
Për fazën e re të dialogut presidenti ka paraparë gjithëpërfshirje të të gjitha isntitucioneve, qeveria dhe partitë politike. Këtë e ka bërë të ditur Thaçi përmes një shkrimi autorial.
“Unë do të punoj për ndërtimin e ekipit të unitetit me përfaqësues nga partitë politike, shoqëria civile etj. Duhet të përgatitemi mirë dhe të jemi të bashkuar sepse Kosova nuk ka kohë për të humbur”, ka shkruar Thaçi.
Ja si e shohin partitë kërkesën e presidentit
Lidhur me këtë kërkesë të presidentit, partitë kosovare kanë mendime të ndryshme rreth asaj nëse do të përfshihen apo jo në dialog me Serbinë.
Deputeti i AAK-së, Pal Lekaj, nuk e sheh problematike takimin e Thaçit me Vuçiçin, por sipas tij duhet të ketë transparence mbi atë se çfarë po ndodh.
Ai ndërkaq e lë të hapur mundësinë që partia e tij t’i bashkohet një ekipi gjithëpërfshirës që të mbrohen të drejtat e shtetit.
“Dialogu nuk ka alternativë për të përmbyllur çështjet e hapura me fqinjin, por kjo duhet të bëhet vetëm në nivel shtetesh. Nuk duhet të ngutemi për t’i rihyrë dialogut me Serbinë, ndërsa nuk e kemi të konsoliduar Kuvendin dhe Qeverinë, por nuk është fundi i botës nëse ndodh ndonjë takim në nivel presidentesh. Vetëm se duhet të bëhen transparente për aq sa janë ato biseda. Nuk ka këtu çështje partish, si Aleancë kemi qenë çdo herë në mbështetje të një dialogu jo abuziv dhe në këtë kuptim duhet të vazhdohet që në një nivel tjetër të këtij dialogu të përfshihen të gjithë akterët politik (pozitë – opozitë), shoqëror e të jetës akademike, pra një ekip i tërë për të treguar se jemi serioz dhe jemi të gatshëm të mbrojmë të drejtën tonë”, thotë Lekaj për tesheshi.com
Bilal Sherifi, deputet i NISMA-s pa dashur të thotë nëse partia e tij do t’i bashkohet një ekipi të unitetit të mundshëm për bisedimet me palën serbe, thekson se e rëndësishme është çfarë mbrohet në takime e jo kush shkon në Bruksel.
“Së pari duhet të konstituohet Kuvendi dhe të formohet qeveria e re, pastaj duhet të hapet debati në Parlament lidhur me bisedimet me Serbinë. Nga debati do të duhej të ndërtohej platforma e përbashkët shtetërore se në çfarë formati duhet të zhvillohen bisedime me Serbinë. Rëndësi ka të ketë pajtueshmëri për përmbajtjen. Forma do të duhej të jetë reflektim i përmbajtjes dhe jo anasjelltas. Për mua rëndësi ka çfarë do të mbrojmë në takime me Serbinë, jo kush do të shkoje atje”, thotë Sherifi për tesheshi.com.
Ndërsa përfaqësues të Lëvizjes Vetëvendosje kanë thënë se për çështjen në fjalë pritet të dalë me një koment në Facebook kryetari Visar Ymeri ndaj nuk mund të japin një përgjigje.
“Nuk mundemi të japim përgjigje pa folur Visari”, ka thënë shkurt Shkodran Hoti, zyrtar për media në Vetëvendosje.
Portali ynë ka tentuar gjatë ditës të marrë edhe një qëndrim nga LDK-ja por drejtues të këtij subjekti nuk janë përgjigjur në telefon.
Kujtojmë se dialogu ndërmjet Kosovës dhe Serbisë, nisi në mars të vitit 2011, ndërsa, marrëveshja për përmirësimin e raporteve u nënshkrua me 19 prill 2013, ndërmjet kryeministrave të atëhershëm, Hashim Thaçi dhe Ivica Daçiç. Njëra ndër pikat me kryesore të marrëveshjes ishte lëvizja e lirë e njerëzve dhe asociacioni i komunave me shumicë serbe. Kjo e fundit akoma nuk është jetësuar për faktin se Gjykata Kushtetuese e Kosovës gjeti se marrëveshja bie ndesh me kushtetutën.
Serbia këmbëngulë në jetësimin e kësaj marrëveshje, madje në disa raste e ka vënë edhe kusht për vazhdimin e dialogut. /tesheshi.com/
