Barcelona i është përgjigjur në të njëjtën mënyrë fitores së djeshme të thellë të Realit të Madridit ndaj Selta Vigos, veçse duke shënuar vetëm katër gola në fitoren ndaj Eibarit.
Katalanasit e vijuan rekordin e pathyeshmërisë, ndërsa e çuan në 36 numrin e ndeshjeve pa humbje në të tëra aktivitetet në këtë sezon. E bënë këtë sot fare thjesht, me shumë pak rezistencë nga Eibari.
Edhe pse pa Iniestën e Nejmarin në fushë, lojtarët e Barcelonës nuk lanë vend për hamendësime sot pasdite në fushën e Eibarit. Me të filluar takimi i vlefshëm për javën e njëzet e tetë të kampionatit spanjoll, miqtë katalanas hapën serinë e golave. Eshtë Munir që në minutën e 8-të i dha epërsinë Barçës me golin e tij. Për t’u pasuar nga një gol i Messit pak para mbarimit të pjesës së parë.
Vendasit e Eibarit u munduan ta vinin në vështirësi kundërshtarin në 45 minutat e dyta, pasi nuk kishin për të humbur asgjë. Por përpjekjet e tyre dështuan ndërsa Messi e Suarez e çuan rezultatin në 0-4 me golat e tyre. Me këto shifra do të mbyllej dhe takimi.
E qetë në krye të renditjes, Barcelona pret të shohë se ç’do të ngjasë në sfidën e mbrëmjes mes Valencias dhe Atletikos së Madridit. /tesheshi.com/
