Pelegrinët palestinezë nga Rripi i Gazës të nisur për haxh kanë mundur të kalojnë për të dytën ditë me radhë në pikën kufitare të Refahut.
Autoritetet kufitare të Gazës kanë njoftuar se vetëm dje e kanë kaluar pikën kufitare 775 pelegrinë, ndërsa 14 prej tyre janë kthyer nga zyrtarët egjiptianë për arsye të paspecifikuara.
Sipas Ministrisë së Vakfeve të Gazës, këtë vit pritet që haxhin ta kryejnë më tepër se 2.000 palestinezë.
Kajroja zyrtare njoftoi javën e shkuar se kalimi kufitar do të ishte përkohësisht i hapur për pelegrinët palestinezë që do të shkojnë të bëjnë haxhin këtë muaj në Arabinë Saudite.
Rripi i Gazës ka shtatë pika kalimi kufitar që e lidhin atë me pjesën tjetër të botës. Gjashtë prej tyre kontrollohen nga Izraeli, e një nga Egjipti.
Pikëkalimi kufitar i Refahut ka qëndruar i mbyllur në pjesën më të madhe të kohës gjatë presidencës së es-Sisit. /tesheshi.com/
