Arkeologët në Egjipt kanë zbuluar varrin e lashtë të një prej argjendarëve mbretërorë, sëbashku me pjesëtarë të tjerë të familjes së tij.
Thesari i gjendur në varr është më i vjetër se 3 mijë vjet. Ngarkesa me bizhuteri dhe statuja në sarkofagët e lashtë, arkivolët tradicionale antropomorfike të përdorura në kohën e faraonëve, u gjetën në Luginën e Mbretërve të Luxorit, dhe duket se i është përkushtuar një dinjitari të identifikuar si Amenemhat.
Ministria e Antikave egjiptiane tha në një deklaratë se në bazë të zbulimeve të bëra në varr, Amenemhat ishte një argjendar që ia kushtoi artin e tij atyre qw u besonte si hyjni.
Në varr janë gjetur dy mumiet e ruajtura në mënyrë të shkëlqyeshme, që besohet të jenë bashkëshortja e Amenemhat-it dhe një nga djemtë e tij të rritur.
Dr. Mostafa Vaziri, i cili udhëhoqi gërmimet, shpjegoi se trupat, duke përfshirë një të tretë që i përkisnin një djali të dytë, u zbuluan brenda një varri të përbashkët.
Gërmuesit arkeologë identifikuan anëtarët e familjes nga një sërë statujash të zbuluara në hyrje të varrit. E para përshkruan Amenemhat-in ulur në një karrige të mbështetur të lartë pranë gruas së tij që mban një fustan të gjatë dhe një parukë. Midis këmbëve të tyre qëndron, në një shkallë më të vogël, një figurë e një prej djemve të tyre. Trupi femëror ishte ai i një gruaje rreth 50 vjeç në kohën e vdekjes së saj.
Numri i abseseve rreth nofullës së saj dhe mbetjeve bakteriale në eshtrat e saj nënkuptonte se kishte gjasa që ajo vuante nga një sërë sëmundjesh kur vdiq, thonë specialistët.
M.Brunga – /tesheshi.com/
