Trupat e sigurisë egjiptiane nisën një fushatë masive kundër grupit Vëllazëria Muslimane në prag të hapjes muajin e ardhshëm të një rruge të re kalimi në Kanalin e Suezit.
Burime të sigurisë, cituar nga agjencia Anadolu kanë ndaluar mbështetës të lëvizjes dhe presidentit të rrëzuar Mohamed Morsi. Deri tani, janë ndaluar 20 anëtarë të Vëllazërisë në pak orë.
Vëllazëria Muslimane, grupi që mbështeti presidentin Morsi në zgjedhje, u përfshi tek grupet “terroriste” nga qeveria e Egjiptit në fund të vitit 2013.
Pas grushtit ushtarak të 2013-ës kundër tij, autoritetet egjiptiane kanë ndërmarrë një fushatë dhune të pandalshme ndaj mbështetësve të ish-presidentit, duke vrarë me qindra dhe ndaluar me dhjetëra mijë prej tyre.
Të martën, Human Rights Watch akuzoi policinë egjiptiane se kishte zhdukur me dhjetëra njerëz pasi i kishte mbajtur të ndaluar në mënyrë sekrete.
Vala e re e “spastrimit” vjen dy javë përpara hapjes zyrtare të kalimit të ri për anijet në Kanalin e Suezit. Projekti është pjesë e planit të Qeverisë për ta shndërruar zonën në kanalin e Suezit në një qendër industriale dhe tregtare.
Autoritetet thonë se projekti do të dyfishojë fitimet e përvitshme nga kanali i Suezit nga 5.3 miliardë në 13 miliardë dollarë./tesheshi/
