Nga Mensur Krasniqi
Siç duket nuk janë vetëm shqiptarët qëllimi i njollosjes dhe ofendimeve nga ana e gazetarit kontrovers maqedonas, Vasko Eftov.
Ai, në emisionin e tij Në Qendër, kësaj rradhe ka provokuar ndjenjat e shtetit turk duke trajtuar temën: “A thua Stambolli do jetë qendra e kalifatit Ballkanik, ndërsa kalifi madh do të jetë presidenti turk Recep Taip Erdogani?”
Mysafir në emisionin e Eftov ishte eksperti për luftën kundër terrorizmit, Xhevad Galijasheviç, ku tha se kalifatin diktatorial e përfaqëson Turqia neo-osmane, ndërsa Erdogani dhe Davutoglu i kanë këto ambicie, pra neo-osmane për tërë Ballkanin.
Por për dallim nga politikanët shqiptarë që asnjëherë nuk ngritën zërin kur u nënçmua kombi ynë në shumë prej emisioneve tendencioze të Eftov-it me analistët serb, ambasada turke në Maqedoni i ka dalë zot shtetit të vet duke reaguar ndaj gjuhës së përdorur nga ky medium maqedonas, Kanal 5.
Me anë të një letre drejtuar kryeredaktores së këtij televizioni, Lidia Bogatinova, ambasadori i Turqisë në Maqedoni, Ömür Şölendil, shprehet se Turqia ka si përparësi paqen dhe stabilitetin e rajonit duke përdorur mekanizmat aktuale ndërkombëtare të përbashkëta si dhe duke formuar mekanizma të reja të ngjashme, e jo siç pretendohet në emisionin e Eftovit, Në Qendër, ku turqit i pasqyron si bartës të Kalifatit Ballkanik.
“Kam mësuar me hidhërim se në televizionin tuaj më datë 25 janar, në programin “In the Centre” (Në Qendër), duke u përdorur një gjuhë me fjalë të papërshtatshme, me një qëllim të keq si dhe pretendime i cili i kalonte kufinjtë e imagjinatës, Turqia është vënë përpara një propagande njollosjeje. Turqia ka vetëm një axhendë për Ballkanin pjesë e së cilës është edhe vetë ajo: vendosjen e sigurisë dhe stabilitetit për një qetësi dhe paqe të qëndrueshme. Turqia e di mire se çfarë do të thotë prania e një destabiliteti në këtë rajon, pasi vetë ajo ka qenë dëshmitare në një të kaluar të afërt”- thuhet në letrën e ambasadorit Şölendil.
Për këtë arsye, ai shprehet se Turqia nuk e ndjen të nevojshme të ketë një axhendë të fshehtë në politikën e saj të jashtme në këtë kontekst.
Ambasadori Şölendil më tej thekson se: “Kjo gjë mund të vërehet lehtë nëse bëhet qoftë edhe një kërkim sipërfaqësor. Turqia ndjek një politikë gjithëpërfshirëse ndaj të gjitha grupeve etnike në rajon. Turqia ka si përparësi paqen dhe stabilitetin e rajonit duke përdorur mekanizmat aktuale ndërkombëtare të përbashkëta si dhe duke formuar mekanizma të reja të ngjashme. Ndërsa fjalët të cilat thuhen për të përcjellë preceptimin se Turqia është duke formuar një shtet islamik në rajon dhe veçanërisht në Maqedoni, nuk janë aspak për t’u marrë për bazë si serioze. Turqia është shteti i parë që njeh Republikën e Maqedonisë me emrin e saj origjinal. Mes dy vendeve ka marrëdhënie të përhapura në shumë fusha dhe shumë të fuqishme. Këto marrëdhënie janë duke ecur përpara me vullnetin e palëkundur të liderëve të të dy vendeve”
Sipas tij, fakti që Turqia ka mbështetur Maqedoninë në të gjitha platformat ndërkombëtare për njësimin dhe bashkimin e saj me institucione të rëndësishme ndërkombëtare siç janë BE-ja dhe NATO, është një fakt që i vetëm mund të hedhë poshtë pretendimet boshe dhe të pabaza. Ai shton se Turqia nuk mbështet vetëm Maqedoninë në integrimin drejt NATO-s dhe BE-së, por të gjitha vendet e Ballkanit, duke e shikuar këtë si një fakt dhe rol për stabilitetin në rajon.
“Turqia do të vazhdojë të forcojë dhe çojë përpara marrëdhëniet me Maqedoninë të ndërtuara mbi bazën e respektit dhe miqësisë. Por dua të theksoj që pretendimet e sjella nga ju në programin ‘In the Centre’’ të cilat nuk kanë asnjë të vërtetë me realitetin, nuk do të jenë në dobinë tuaj pasi ndjekësit dhe shikuesit e ‘Kanal 5’ e kuptojnë më së miri pavërtetësinë e tyre shumë lehtë”, përfundon letrën e tij ambasadori i Turqisë në Maqedoni, Ömür Şölendil, drejtuar kryeredaktores së televizionit Kanal 5, Lidia Bogatinova.
I kontaktuar nga portali tesheshi.com, drejtuesi i emisionit Në Qendër, Vasko Eftov, tha se nuk deshi të komentojë rreth kësaj çështje, meqë sipas tij është turp që në një shtet demokratik, ambasada e një shteti të reagojë ndaj qëndrimeve politike.
“Nuk kam çka të komentoj. Mendoj se është turp që në një shtet demokratik si Maqedonia, të reagojë një ambasadë ndaj qëndrimeve politike”, është shprehur shkurt për tesheshi.com, Vasko Eftov. /tesheshi.com/
