Fjalimin e tij të fundjavës në rrjete sociale, një rit komunikimi ky i startuar që prej dy muajsh, kryeministri Rama i kushtoi kumtimit orej tij të faktit se qeveria ka vendosur – me dorë në zemër – që të zerojë kamatëvonesat për faturat e papaguara te energjisë elektrike, për pensionistët, familjet me ndihmë ekonomike dhe personat me aftësi të kufizuar.
Vendimin e komunikoi vetë Rama, i cili tha se është pjesë e paketës së solidaritetit.
“Për 66539 konsumatorë pensionistë, ata me ndihmë ekonomike dhe ata me status tjetër vështirësie do të zerohen të gjitha kamatëvonesat kundrejt një pagese simbolike vetëm 20 lek. 59461 konsumatorë të tjerë që nuk kanë ndonjë status të vështirësie, por që kanë paguar këstet 20 dhe 25 mijë lek, kamatëvonesat do të reduktohen në 80 %”, tha Rama.
Dhe kjo sipas shefit të qeverisë shqiptare, u bë e mundur me përmirësimin e menaxhimit të OSHEE-së, siç tha ai, “pas një reforme që padyshim ishte e dhimbshme”.
Sipas një përllogaritjeje, nga falja dhe reduktimi i kamatëvonesave përfitojnë në total rreth 126 mijë konsumatorë.
Ky zhvillim vjen pak muaj para zgjedhjeve, ku siç po shihet qeveria po tenton të marrë me të mirë atë pjesë të popullatës që u shtrëngua t’i përgjigjet oparacionit për pagesën e energjisë. /tesheshi.com/
