Gjykata Kushtetuse tashmë e mori vendimin e saj për vettingun; dhe është marrë vesh kush ka votuar pro dhe kush kundër.
Vetëm dy anëtarë të saj, Gani Dizdari dhe Vladimir Kristo kanë votuar kundër ligjit të vettingut duke kërkuar rrëzimin e tërësishëm të tij.
Dhe siç dihet, këta janë dy zyrtarë me lidhje të forta me PD-në.
Gani Dizdari, ka ardhur në majën e drejtësisë nga Tropoja, si një prurje klasike e PD-së, e cila e ka pas emëruar edhe në kupolën e Prokurorisë së Përgjithshme, ku punoi derisa doli privat si avokat. U emërua në Kushtetuese në vitin 2011 në kulmin e Berishës.
Ndërkaq, Vladimir Kristo ka pasur që në “agim” të karrierës së vet një lidhje të fortë me qeverisjen e PD-së, pasi ka qenë zv.ministri i Drejtësisë i kabinetit të parë të drejtuar nga Aleksandër Meksi në 1992-shin, por pas largimit të Fehmi Abdiut u emërua si kryetar i Gjykatës Kushtetues, natyrisht pas fitores së PD-së. Aq lidhje të fortë ka Kristo me Berishën, sa kur doktori ishte President e emëroi atë si kryetar i KQZ-së për referendumin e Projekt-Kushtetutës së vitit 1994 që humbi fuqishëm në popull.
Por tani që u miratua vettingu ç’ndodh?!
Institucionet e reja të drejtësisë sërish janë peng i Kushtetueses pasi PD dërgoi dje një ligj tjetër të reformës, siç është ai i qeverisjes së organeve të drejtësisë, ku hyjnë Këshilli i lartë i Prokurorisë dhe Këshilli i lartë i Gjyqësorit.
Dhe këto institucione pritet të ngrihen avash avash.
Por vettingu është kaq i rëndësishëm pasi nga ai varet ngritja e dy institucioneve të reja që janë gati tashmë: Byroja Federale e Hetimit dhe Prokuroria Speciale.
Menjëherë pritet që Grupi Monitorues Ndërkombëtar që përbëhet nga Euralius dhe Obdat, pra SHBA dhe BE, të nisin hetimin e pasurisë dhe moralit të kandidatëve për agjentë të FBI-së shqiptare dhe të SPAK.
Kandidatët janë marrë me kohë, dhe në Tiranë kanë mbërritur dy prokurorë amerikanë, një agjent i FBI-së amerikane dhe dy prokurorë nga Kroacia dhe Rumania, të cilët do të nisin përzgjedhjen e emrave të këtyre insttitucioneve.
Fiks dy javë më përpara, ambasadori amerikan Donald Lu ka anonçuar ardhjen në Tiranë të një prokurori federal dhe agjenti të FB-së, të cilët do të ndjekin ngushtë ngritjen e Prokurorisë Speciale dhe Byrosë Federale të Hetimet.
Ata janë Mark Chutkow dhe Robert F Beeckman, të dy me një profil të qartë dhe përvojë në operacionet antikorrupsion.
Mark Chutkow ka qenë shef i sektorit kriminal në Prokurorinë e Michigan-it në Shtetet e Bashkuara të Amerikës. Në një periudhë të gjatë kohe ka shërbyer dhe si Shef i Sektorit Antikorrupsion.
Ai ka ndjekur më shumë se 30 raste të nivelit të lartë të korrupsionit kryesisht në bashkinë e Detroit, duke përfshirë dhe ish-kryetarin e atyshëmedhe zyrtarë të tjerë të lartë.
Ai ka punuar edhe si prokuror në zyrën e Seattle. Është diplomuar për ligj në Universitetin e Yale dhe ka marrë masterin në Universitetin e Chicagos.
Robert Beckman është një agjent special i FBI-së, i njohur shumë në publikun amerikan për raste të bujshme hetimi në fushën e korrupsionit.
Ai së bashku me prokurorin Chutkow kan ndjekur në vitin 2002 rastin e korrupsionit të madh në bashkinë e Detroidit, ku përfundoi në burg kryebashkiaku Kwame Kilpatrick. Njihet si person mjaft korrekt dhe është portretizuar nga media amerikane si një mjeshtër i gjetjes së parave të fshehura në kompani offshore dhe llogari fantazmë.
Gjatë një dalje shtypi në Konferencën antikorrupsion, ambasadori i SHBA-së, Donald Lu ka prezantuar gjyqtarët dhe prokurorët specialë të SHBA-së, që janë tashmë në Shqipëri për të ndihmuar kryerjen e kësaj reforme.
“Më lejoni të falënderoj pjesëmarrësit tanë të shumtë që sjellin përvoja antikorrupsioni nga Kroacia, Rumania dhe ekzotiku Detroit i Miçiganit – Gjykatësen Koraljka Bumci, Prokuroren Florentina Mirica, Prokurorin Federal të Shteteve të Bashkuara Mark Chutkow dhe Agjentin Special të FBI-së Robert Beckman. Jemi të përkushtuar që të kemi një diskutim të gjallë dhe të sinqertë gjatë këtyre tri ditëve”, tha Lu para dy javëve.
Të gjitha database-t e zyrtarëve të korruptuar shqiptarë tashmë janë gati dhe hetimet kanë bazë të sigurtë për të vazhduar pasi ndodhen në zyrën e Reinhard Priebes në Bruksel.
Por gjithçka do të varet nga shpejtësia e operacioneve të SPAK dhe BKH dhe eventeve politike që do të ndjekin Shqipërinë, të cilat priten të jenë mjaft të zhurmshme që të mbulojnë tringëllimën dhe bujën e prangave VIP. /tesheshi.com/
