Është ndoshta i vetmi rast në politikën shqiptare ku një ankronim partiak ofrohet dhe në gjuhën greke, brenda territorit të vendit. Dhe kjo ndodh me LSI-në, partinë e Ilir Metës, ku zhvillimet politike e kanë vendosur – ndoshta për koiçidencë me foto-faktin – përballë PDIU-së së Shpëtim Idrizit, në një përplasje me njëra-tjetrën.
Ndodh kjo në Sofratikë të Dropullit, një prej fshatrave kryesore të kësaj zone, aty ku “ligjin e bën” Vangjel Tavo, deputet i LSI-së në Gjirokastër, i cili me influencën e tij në pjesën minoritare – si minoritar që është, nga Jergucati – ka arritur që ta bëjë partinë e Metës dominuese në Dropull; kjo pas rënies së influencës së PBDNJ-së Dules. Duhet theksuar me këtë rast se PBDNJ nis të dobësohet si forcë që pas liberalizmit të vizave në vitin 2010, pasi njihej si “parti vizash”; për ta marrë goditjen e madhe në zgjedhjet lokale të vitit 2015, ku pothuajse u tkurr e gjitha.
Dhe tani, fjalën atje e ka LSI, parti e cila ka dhe Bashkinë e Gjirokastrës; edhe në këtë rast falë Vangjel Tavos, njeriut që luan rolin e një pushteti paralel në qytetin jugor dhe zonat përreth. Për të zgjidhur një problem nuk të duhet shteti, mjaft të kontaktohet Tavo – ose Tavua, siç i thonë ndryshe.
LSI-ja e greqizuar në zemër të Dropullit, është një tjetër dëshmi e këtij fakti. /tesheshi.com/
