Manjati e kuptoi se modeli i funksionimit të klubit me njerëzit e tij, siç promovoi fillimisht, nuk mund të vazhdonte, mes sanksioneve të ashpra ndaj oligarkëve rusë – Ai tashmë është në bisedime me biznesmenë “gjigantë” për të marrë drejtimin e ekipit londinez – Kush është Hansjorg Bis që iu ofrua për të blerë klubin?
Lufta e Rusisë në Ukrainë po provokon një reagim zinxhir në mbarë botën. “Oligarkët” rusë ishin ndër të parët që u prekën nga sanksionet e shpallura nga Perëndimi. Roman Abramovich është njëri prej tyre dhe për shkak të marrëdhënies së ngushtë me Vladimir Putinin, aktualisht ndodhet në një pozitë shumë të vështirë. Një nga hapat e tij të parë pas shpalljes së sanksioneve ishte transferimi i aksioneve të tij në klubin londinez te 6 drejtuesit e bamirësisë së klubit.
Megjithatë, ishte e qartë që në fillim se asnjë nga Bruce Buck, Emma Hayes, John Devine, Piara Power, Paul Ramos, Sir Hugh Robertson, nuk do pranonte.
Shqetësimi buronte nga një konflikt i mundshëm interesi, por kryesisht nga lidhja e mundshme e administratorëve me pushtimin rus të Ukrainës pasi ata konsiderohen (dhe janë) njerëz të Abramovich-it, i cili nga ana e tij është njeriu i Putinit.
Sipas Daily Mail, Roman Abramovich pas zhvillimeve të fundit dhe duke parë që plani me fondacionin e klubit nuk do të funksionojë, ka nxjerrë në shitje Chelsean për ta “hequr qafe”. Sa kërkon ai? Me rreth 3 miliardë paund, biznesmeni ruso-izraelit do të ishte… i kënaqur.
Chelsea beson se shitja te një manjati amerikan është mënyra më e mirë, pavarësisht se miliarderi zviceran Hansjorg Weiss pretendon se i është ofruar një “sipërmarrje e përbashkët” prej 2,2 miliardë dollarësh me “gjashtë apo shtatë” investitorë të tjerë për blerjen e klubit.
Oligarku rus, i cili bleu klubin në vitin 2003, ka refuzuar disa oferta për Chelsean, ndërsa klubi ka disa borxhe jo të vogla. Një bankë tregtare amerikane besohet se ka marrë përsipër shitjen e klubit, me palët e interesuara që pritet të dorëzojnë ofertat e tyre deri në fund të javës.
Weiss, një manjat mjekësor 86-vjeçar me një pasuri prej 34.3 miliardë dollarësh, ka pranuar se është i interesuar të blejë klubin me bazë në Stamford Bridge nga Abramovich, por si anëtar i një konsorciumi. Ai pranoi se do të shqyrtonte detajet e çdo marrëveshjeje të mundshme për të blerë Chelsea-n.
“Abramoviç po përpiqet të shesë të gjitha vilat e tij në Angli, ai gjithashtu dëshiron të heqë qafe Chelsean shpejt”, tha Weiss për gazetën zvicerane Blick, duke shtuar: “Tre persona të tjerë dhe unë morëm një ofertë të martën për të blerë Chelsea-n nga Abramovich. Tani më duhet të pres katër deri në pesë ditë. Abramovich po kërkon shumë për momentin. Ka borxhe dhe prandaj nuk e dimë ende çmimin e saktë të shitjes”.
Miliarderi zviceran, i cili themeloi kompaninë e pajisjeve mjekësore Synthes USA, këmbënguli se ai mund të konsideronte një marrëveshje për Chelsea-n vetëm me një grup partnerësh investimi. “Mund ta imagjinoj fare mirë fillimin në Chelsea me partnerë”, tha Weiss. “Por më parë duhet të shikoj situatën e përgjithshme, pasi ajo që mund të them tashmë është: sigurisht që nuk do ta bëj një gjë të tillë vetë”.
Raportet e fundit sugjerojnë gjithashtu se Abramovich po përpiqet të ndërmjetësojë një marrëveshje paqeje midis Rusisë dhe Ukrainës, madje duke marrë pjesë në bisedimet në Bjellorusi. /tesheshi.com/
