Këshilli i Sigurimit i OKB-së do duhej të votonte një projektrezolutë që i kërkon Izraelit t’i ndalojë menjëherë të gjitha aktivitetet e ngulimeve në territoret e pushtuara palestineze, si një shkelje flagrante e ligjit ndërkombëtar.
Egjipti e ka tërhequr projektrezolutën e tij papritmas pak orë para nisjes së takimit të OKB-së. BBC-ja flet për një bisedë telefonike të presidentit egjiptian, Abdel al-Sisi, me Donald Trump-in, presidentin e ardhshëm të SHBA-së.
Një bisedë prej së cilës është dalë me një njoftim nga zyra e kreut të shtetit egjiptian, ku thuhet se dy udhëheqësit kanë qenë të mendimit se administratës së re amerikane duhet t’i jepet një mundësi për ta trajtuar çështjen.
BBC-ja bën të qartë rrjedhën e ngjarjes që ka çuar në mosvotimin e projektrezolutës e cila i dënon ndërtimet e ngulimeve izraelite në territoret e pushtuara palestineze.
Një zyrtar amerikan i ka treguar rrjetit informativ britanik se qe marrë në konsideratë një abstenim, gjë që do t’i jepte mundësi projektrezolutës të miratohej. Atëherë, siç i ka raportuar një zyrtar izraelit Reuters-it, Izraeli i ka kërkuar ekipit të Trump-it të ndërhyjë.
Trump bëri të ditur përmes një deklarate se Uashingtoni duhej të përdorte veton për ta bllokuar rezolutën.
“Duhet vënë vetoja për rezolutën në shqyrtim në Këshillin e Sigurimit të OKB-së në lidhje me Izraelin,” thuhej në deklaratën e Trump-it, që shtonte se, “…paqja mes izraelitëve dhe palestinezëve do të vijë vetëm përmes negociatave të drejtpërdrejta midis palëve, e jo nëpërmjet imponimit të kushteve nga Kombet e Bashkuara”.
“Kjo e vë Izraelin në një pozitë negociimi shumë të dobët, dhe është tejet e pandershme për të gjithë izraelitët,” shprehej në të njëjtën deklaratë.
Katër vende të tjera anëtare të Këshillit të Sigurimit, me një mandat dyvjeçar, paralajmëruan se nëse Egjipti heq dorë plotësisht nga projektrezoluta, atë do ta çojnë përpara shtete të tjera të organizmit botëror.
Zelanda e Re, Venezuela, Malajzia dhe Senegali deklaruan se rezevonin të drejtën për ta çuar nismën në votim. /tesheshi.com/
