Ditë pasi presidenti Erdogan u ishte në Beograd me një shpurë biznesmenësh turq, të gatshëm për investime në Serbi, e ku për këtë arsye faktori shqiptar në rajon u ndje paksa keq, i xhelozuar apo i braktisur nga “vëllai i madh”, kreu i diplomacisë kosovare, Behgjet Pacolli, është përpjekur të bëjë diçka për ta kthyer timonin e investimeve turke kah vendi i tij, ku në fakt, në një pjesë mediash apo të kastës politike turku është shpallur e vijon të shpallet hasëm.
Pacolli e hapi forumin e biznesit Turqi – Kosovë, së bashku me ministrin e Zhvillimit të Turqisë, Lutfi Elvan, në prezencën e shumë kompanive, si nga pala turke por edhe nga ajo e Kosovës.
Ai i vlerësoi investimet e deritanishme turke në Kosovë, si për t’i marrë me të mirë, duke bërë thirrje që këto investime të rriten edhe më shumë. Si kartë për këtë përdori dhe afërsinë mes dy vendeve e dy popujve, veç pozicionit gjeografik të Kosovës më afër Evropës, si dhe lehtësimin e procedurave për të bërë biznes. /tesheshi.com/
