Kanë dhënë efekt të menjëhershëm paralajmërimet e forta të ndërkombëtarëve, gjë që e ka bërë protestën e 9-të të opozitës jashtëparlamentare PD-LSI, që të shkëlqejë nga mungesa e çdo nuance dhune, e çdo incidenti.
Ndërsa fjala e kreut demokrat Basha, ka qenë po ajo, me përbetimin për moszgjedhje më 30 qershor, e gjithashtu rrëzimin e Ramës.
“Edi Rama marshon drejt gushtit të shtetit, drejt votimeve pa opozitën, me KQZ të paligjshme, me karta identiteti të paligjshme. Ta dijë mirë Edi Rama se nuk ka zgjedhje më 30 qershor, nuk bëhet asnjë hap pas.
Aleanca qytetare është në këmbë, beteja vazhdon qytete më qytet, fshat më fshat, demokracia është në këmbë kundër krimit. Çdo tentativë për të provokuar shqiptarët do të dështojë, ndërsa 30 qershori do të jetë varreza politike e Edi Ramës dhe e Rilindjes.
Këto mesazhe të qarta, që shumëkush prej jush i di fare mirë, i bëjmë sonte të qarta për këdo që nuk i di, nuk do të ketë më në Shqipëri zgjedhje me Edi Ramën nuk do të ketë proces politik pa dënuar hajdutët e votave. Ky është standardi i Europës dhe Perëndimit. Nuk ka paqe pa drejtësi, nuk ka zgjedhje pa drejtësi”, tha Basha.
Ky ishte fjalimi nr.1, ai para kryeministrisë. Ndërsa në atë nr.2 te selia e PD-së, si në çdo mbylle, Basha përsëriti të njëjtat mesazhe, por që te kushtet përfshiu dhe lirimin e ish-deputetit Bardh Spahia, si dhe arrestimin e hajdutëve të votave, referuar përgjimeve të publikuara nga Bild.
“Mirënjohje kam për gjithë qytetarët e Tiranës, për gjithë qytetarët shqiptarë që u bashkuan dhe u derdhën sonte në atë që do të njihet si oqeani i shpresës që nisi ndryshimin e madh. Asgjë nuk na ndal asnjë hap pas nuk hedhim, 30 qershori është varreza politike e Edi Ramës, zgjedhje pa opozitën nuk ka dhe nuk do të ketë kurrë.
Sonte me bekimin dhe kërkesën tuaj, qëndrimit tonë politik për zgjidhjen e kësaj krizë përmes kushtit të panegociueshëm të largimit të Edi Ramës, të një qeverie tranzitore që do të përgatisë zgjedhje të lira dhe të ndershme, i shtohet një tjetër kusht i panegociueshëm, arrestimi dhe çuarja para drejtësisë e hajdutëve të votave tuaja, nga i pari tek i fundit.
Nuk ka paqe pa drejtësi, nuk do të ketë në Shqipëri zgjedhje të lira pa çuar para drejtësisë hajdutët e zgjedhjeve. Duke kujtuar me respekt dhe mirënjohje çdo liberator të arrestuar dhe të mbajtur padrejtësisht në burg, nga Bardh Spahia me shokë, dua t’i them kupolës mafioze, të gjithë veglave qorre, nga Sandër Lleshaj tek kushdo shkel ligjin, shumë shpejt do ta zëvendësoni Bardh Spahinë në qeli, ju do të shkoni atje”, tha Basha.
E ndërkohë që opozita protestonte kundër Ramës, ky i fundit ndodhej në Butrint duke ndjekur një koncert të Carla Brunit, nën shoqërinë e bashkëshortit të tij, ish-presidentit Sarkozy. /tesheshi.com/
