Menjëherë pas dakortësisë mes SHBA-së Lulzim Bashës për të arritur konsensus me Edi Ramën mbi reformën, ka shpërthyer LSI-ja.
Ilir Meta i ka bërë të ditur partnerit të tij se tashmë nuk janë aleatë: “Kërko vota nga Basha”.
LSI ka bërë gati sulmin dhe mësohet se është gati edhe një mocion mosbesimi ndaj kryeministrit, për të cilin LSI-ja do të votojë për largimin e tij. Por e gjitha kjo do të bëhet pas shpalljes së largimit të LSI-së nga koalicioni me Partinë Socialiste.
Në vilën e Metës në Gjirin e Lalzit janë zhvilluar negociata të ethshme, ku Hashim Thaçi, presidenti i Kosovs, ëshë fitur si negociator mes Edi Ramës dhe Ilir Metës.
Ndërkaq, mediat pranë LSI-së e kanë bërë planin, të cilin e quajnë “D”.
Ja ç’shkruan Nikollë Lesi i Koha Jonë, i cili prej muajsh mban një qëndrim të fortë pro LSI-së.
“Nga 2015 e në vazhdim qeverisja është degjeneruar nga kalamanllëku në qeveri, nga korrupsioni shkatërrues, nga megallomania e Edi Ramës dhe aftësia deri në krim për të blerë heshtjen e gjithëkujt, nga dëshira për të patur fushën e pastër në të majtën politike me synim shkrirjen e çdo elementi konkurues dhe kundërshtues. Nga frika dhe mosmirënjohja për Ben Blushin, me të cilin kanë bërë planet, idetë dhe projektin e PS-së në shtator 2005, tashmë e ka shpallur armik.
Nga pabesia ndaj Ilir Metës, por që Meta e meriton. E meriton se i besoi, Ramës.
Tani jemi para fazës finale të 21 korrikut.
Plani “A” është miratimi me konsensus i Reformës. Nuk do ndodhë. Jo se nuk duhet, porse nuk do Rama. Plani “B” do dështoj, pra fatkqesisht Reforma nuk miratohet. Plani “C” i Edi Ramës çuarje e vendit në zgjedhje të parakohshme parlamentare. Nuk do të mundet ! Fillon plani “D”. Mocion ndaj kryeministrit Rama. Rrëzimi i tij dhe krijimi i një qeveri teknike me mandat deri në zgjedhjet e radhës parlamentare në korrik 2017. Qeveria e re, edhe me disa vota nga PS, kalon Reformën Zgjedhore, miraton Reformën në Drejtësi me konsensus, merr statusin e hapjes së negociatave me BE, stabilizon ekonominë dhe borxhin publik
Dhe shkon në zgjedhje 2017,
Më pas vendos populli se kush e merr pushtetin.
Por, për dreq, mund të ndodhë edhe që Rama të heq “brekët” vetëm që të qëndrojë në pushtet: të pranojë konsensus, pra plani ‘A’”.
Ndërkaq, Petrit Vasili, kryetar i grupit parlamentar të LSI-së i ka kërkuar shpjegime të menjëhershme kreut të komisionit të reformës, Fatmir Xhafaj.
“Gjatë punës në komision si edhe në takime me përfaqësues ndërkombëtarë të përfshirë në çështjen e reformës në sistemin e drejtësisë është folur për negocime të disa varianteve konkrete për gjetjen e mirëkuptimit mes maxhorancës dhe opozitës lidhur me çështje të mbetura pezull e sidomos çështjes së procesit të rivlerësimit (vetingut).
Si anëtar i komisionit të posaçëm të reformës në sistemin e drejtësisë kërkoj nga ju të informohem konkretisht lidhur me këto variante zgjidhjeje, të cilat po negociohen, pasi kjo është një domosdoshmëri politike dhe parlamentare si dhe detyrim i imi edhe në cilësinë e kryetarit të grupit parlamentar të LSI për të informuar grupin parlamentar si dhe për formësuar një qëndrim politik e profesional të argumentuar lidhur me to.
Ne se ky negocim është tërësisht konfidencial dhe është e pamundur për të më informuar konkretisht për të dhe variantet konkrete që diskutohen, ju lutem më informoni edhe për këtë.
Duke vlerësuar mirëkuptimin reciprok edhe personal me ju, mendoj se komunikimi institucional është një domosdoshmëri për të ecur në dimensionin e transparencës, që i hap rrugën zgjidhjeve të problemit si dhe ndihmon në çuarjen përpara të procesit të reformës në sistemin e drejtësisë, si dhe të ndërgjegjësimit të përgjegjshëm për hapat dhe zgjidhjet e ndërmarra”, shkruan Vasili.
Të gjitha këto zhvillime, i bëjnë të pashmangshme zgjedhjet e parakohshme, të cilat në këtë, si në çdo rast, janë një shans për zgjidhjen e ngërçeve politike. /tesheshi.com/
