Kryeministri i Kosovës Avdullah Hoti emëroi Besnik Tahirin si ministër të përkohshëm të Jashtëm dhe Diasporës, një vendim ky i provokuar nga dorëheqja e beftë e ministres Meliza Haradinaj-Stublla, e cila vinte nga Aleanca për Ardhmërinë e Kosovës.
Haradinaj-Stublla dha dorëheqjen për shkak të, siç deklaroi ajo, të “një skeme piramidale shpifjesh, linçimesh, presionesh, manipulimesh dhe shantazhesh” kundër saj dhe familjes së saj.
Florentina Gjergjaj e së njëjtës parti, AAK-së, akuzoi kolegen e saj Meliza Haradinaj-Stublla për vjedhje të votave, duke siguruar një vend në Kuvendin e Kosovës.
Një panel zgjedhor për apelime dhe peticione miratoi një apel nga Florentina Gjergjaj, e cila kërkoi që votat me kusht në të gjitha komunat në Kosovë dhe të gjitha fletët e votimit nga diaspora, ato të marra nga kandidatët e partisë, të rinumërohen.
Haradinaj-Stublla gjithashtu dha dorëheqjen nga të gjitha pozitat në Aleancën për Ardhmërinë e Kosovës dhe nga anëtarësimi në këtë parti.
Ajo kërkoi që Prokuroria e Kosovës të sqarojë, sa më shpejt të jetë e mundur, vërtetësinë e videos, e cila u publikua nga disa, siç tha, “pseudo-portale”, si dhe vërtetimin e të gjitha akuzave që atakojnë familjen e saj dhe atë për blerjen e votave.
Haradinaj-Stublla pretendon se vetëm numërimi i disa kutive të votimit nuk do të zbulojë të vërtetën e plotë, “duke pasur parasysh që gjeneza e problemit qëndron pikërisht në pretendimet e bëra në atë video”, prandaj po kërkon një numërim total të votave. /tesheshi.com/
