Referendumi që do të mbahet në qershor të këtij viti në Britani për qëndrimin ose daljen nga BE-ja do të ketë ndikimet e veta dhe në futbollin e këtij vendi.
BBC-ja i kushton një analizë në ditën e sotme asaj se çka pritet të ngjasë me futbollin nëse Brexit-i bëhet realitet, duke numëruar si efektet pozitive ashtu edhe ato negative.
Sipas ekspertëve, futbolli britanik mund të ndryshojë rrënjësisht nëse britanikët votojnë për ta lënë Bashkimin Europian.
“Largimi nga BE-ja do të ketë një efekt shumë të madh mbi futbollin nga ç’mendojnë njerëzit,” është shprehur agjenti i futbollit Rachel Anderson.
“Po flasim mbi gjysmën e Premier League-s që kërkon leje pune.”
Një pjesë e mirë e njerëzve të këtij sektori druhen se me daljen nga BE-ja mund ta humbin të drejtën për të luajtur më shumë se 400 lojtarë.
Mirëpo, ata që e shohin Brexit-in nga një dritë pozitive, janë të mendimit se ai do t’u japë mundësi talenteve vendase që t’i gjejnë më kollaj hapësirat për ta shfaqur veten.
“Ndikimi afatshkurtër do të jetë i madh, por mund të pretendoni se do të jetë ndihmës në planin afatgjatë, ndërsa mund t’i detyrojë klubet të përqendrohen në talentet e rritur në vend,” ka shtuar i njëjti agjent futbolli.
Gjithsesi, edhe drejtuesit e futbollit britanik besojnë se është e pamundur të parashikohet se ç’do të ngjasë, për shembull, me lojtarët e huaj nëse Britania zgjedh të dalë nga BE-ja. /tesheshi.com/
