Ka ndjekur Presidentin Bujar Nishani, Kryeprokurori i Republikës, Adriatik Lalla, në letrën drejtuar Kuvendin, ku bën të dtur se Prokuroria e Përgjithshme gjendet në ngërç pas Kushtetutës së Re me definicionet e reja të reformës në drejtësi.
Ajo që shkruan Prokurori i Përgjithshëm është se meqë në ndryshimet Kushtetuese, kompetencat për hetimin e zyrtarëve të lartë i janë dhënë Prokurorisë Speciale-SPAK, nuk do të mundet të hetohen zyrtarët që tashmë janë pjesë e dosjeve hetimore nga ana e Prokurorisë së Përgjithshme.
Prokuroria konstaton me shqetësim për vijimin e hetimeve për dosjet që janë aktualisht nën shqyrtim, siç është për shembull dosja e deputetit Armando Prenga në Gjykatën e Larte apo fati i hetimeve për gjyqtaren Majlinda Andrea.
Organi qendror i akuzës shikon si problematike edhe heqjen e së drejtës Prokurorit të Përgjithshëm për vendimarrjen, sepse kjo kompetence i caktohet Këshillit të Lartë të Prokurorisë.
Llalla kërkon ashtu si Presidenti i Republikës, që deri në ngritjen e institucioneve të reja të drejtësisë, të veprojë skema aktuale ku Prokuroria e Përgjithshme cakton vijimësinë e hetimit të zyrtarëve të lartë nëpërmjet kordinimit me Gjykatën e Lartë.
Një ekspert ndërkombëtar që ka qenë pjesë e hartimit të reformës në drejtësi, por që nuk donte të flasë në publik për arsye se nuk ia lejon statusi, theksoi për tesheshi.com se nëse një dispozitë kalimtare do të përcaktonte se deri në ngritjen e Prokurorisë Speciale, Këshillit të Prokurorisë dhe Byrosë Kombëtare të Hetimeve, do të vepronte Prokuroria e Përgjithshme me kompetencat e institucioneve të reja, atëherë do të mund të kishte me plot gojë një ekzistencë të organeve paralele të shtetit.
Pra, Prokuroria e Përgjithshme mund të niste hetimin për dosjet që nuk i ka bërë për 15 vite, duke “kontaminuar” apo prishur punën e SPAK dhe BKH-së, të cilët do të duhet të veprojnë në themel ndaj zyrtarëve më të korruptuar, fillimisht në nivelin e lartë e deri në strukturat më të ulëta të shtetit.
Nëse Gjykata e Lartë do të niste të shqyrtonte dosjet e sjella nga Prokuroria, atëherë realisht do të binte jo vetëm ligji i vettingut, i cili do të duhet të rivlerësojë në radhë të parë prokurorët e Prokurorisë së Përgjithshme dhe anëtarët e Gjykatës së Lartë, por edhe 5 ligjet e tjera.
Kjo pasi do t’i jepte për 8 muaj një fuqi ekskluzive Prokurorisë së Përgjithshme, e cila duke qenë një institucion që ndryshon totalisht, rrezikon të veprojë si një armë politike apo edhe personale, pasi për 8 muaj derisa të mbyllet funksioni i “mbretit” të akuzës mund të bënte atë që se ka bërë për 25 vjet, por natyrisht pa pasur dikë që ta monitoronte.
Kjo pasi sipas Kushtetutës së vjetër, Prokurori i Përgjithshëm është ai që emëron e shkarkon prokurorët, por edhe cakton dosjet e hetimit.
Në Kushtetutën e Re, secili prokuror është i pavarur në punën e tij, ku Prokurori i Përgjithshëm është thjesht kreu administrativ.
Kurse Prokuroria Speciale nuk ka thuajse asnjë varësi, as vertikale e as horizontale me Kryeprokurorin.
Ndaj, letra e Llallës është një dëshmi që po konsiderohet e rrezikshme nga ndërkombëtarët, të cilët pritet që vettingun ta praktikojnë më shumë kryesisht në organ e akuzës. /tesheshi.com/
