Eduard Selami ka deklaruar se tronditja e ish-udhëheqësve të PD-së sot për humbjen në zgjedhje duket e shtirur, pasi ajo shikohej prej kohësh dhe ka vënë si shkak kryesor prishjen me SHBA dhe BE-në.
Duke folur në një intervistë me Sokol Ballën në Top Story, kandidati për kreun e ri të PD-së ka pranuar se është linçuar dhe kërcënuar brenda partisë, por nuk i vuri rëndësi çështjes.
Në mënyrë të prerë ai ka akuzuar Lulzim Bashën se ka marrë vendime të cilat kanë tronditur PD-në nga qendra në bazë.
“Problem është kultura. Po guxove të kundërshtosh kryetarin je jashtë. Kjo është histori e shëmtuar sepse nuk është çështje personash, por çështje demokracie. Nëse ia pret je në autoritarizëm dhe jo në demokraci. 20 kryetarë të degëve rajonale të PD u hoqën pa u lajmëruar fare. Këto janë probleme që kemi prej 20 vjetësh”, tha ish-kryetari që po tenton të garojë, por që sërish si para 20 vjetësh po e linçojnë.
Duke folur për garën, Selami u tregua i moderuar, edhe pse deklaroi se do të ishte mirë të shtyhej ajo pasi nuk ishte krejt në kushte të barabarta. /tesheshi.com/
