Aktivistja sociale Edlira Dyrmishaj fiton vendin e parë në shkallë vendi në garën “Të rinjtë e Vitit Në Shoqërinë Civile 2016” me kandidaturën: Kundër diskriminimit ndaj grave dhe vajzave muslimane të mbuluara, për integrimin e tyre pa barriera dhe paragjykime”.
Pas marrjes së çmimit ajo u shpreh: “Ne jemi ai vend i cili me kulturën, traditën e shëndoshë, e rishtazi me përpjekjet për rritje politike dhe diplomatike në skenën ndërkombëtare, kemi çfarë modelesh të ofrojmë dhe kemi atë aset për të cilin duhet të jemi më shumë krenar se kurrë, rininë. Sot, Shqipëria dhe në vecanti rinia, ata të cilët nesër do të jenë në drejtimin e vendit,i tha një JO të forte, diskriminimit për shkak të mbulesës.Dhe me të mbyllën një kapitull të vjetër duke hapur një faqe të re në qasjen ndaj asaj që, me dashuri, përkushtim dhe pakushte, është përmbajtje dhe pjesë përbërëse e këtij kombi dhe këtij shteti.
Me shifra reflektuam atë që jemi dhe atë që dimë bukur të bëjmë, e për të cilën na njeh bota.
Sot ndihem akoma më e privilegjyar të përfaqësoj atë ëndërr, profetësia e të cilës merr jetë pikërisht nga ambientet elitare të vendimmarrjes së shtetit shqiptar.Si një mesazh I cili premton një të ardhme më të mirë, për ne për ju për të gjithë. Përjetim magjik. Nuk gjej fjalë, për të shprehur gjithë mirënjohjen dhe falenderimin për emocionet që më keni dhuruar, me mbështetjen dhe bashkimin tuaj.
Ju, jeni më e ndritura fitore”.
Rrjeti Kombëtar për të Rinjtë në Shqipëri (ANYN) në bashkëpunim me Lidershipin e të Rinjve të Tiranës dhe CRCA Shqipëri, mbështetur nga Olof Palme International Center, në tetor të këtij viti, hapi thirrjen për nominime në kuadër të nismës “Të rinjtë e vitit 2016”
Nisma synonte që vetë të rinjtë të identifikonin, rendisnin dhe vlerësonin publikisht të rinj e të reja nga e gjithë Shqipëria që më së miri përgjatë vitit 2016 kanë sjellë një ndryshim të matshëm në shoqërinë dhe komunitetet ku ata jetojnë, në shkollat dhe universitetet ku ata studiojnë apo vendin e punës ku kontribuojnë. Përmes kësaj thirrje u ftuan të gjithë partnerët dhe individët e interesuar që të nominonin me propozimet e tyre të rinj që kanë dhënë kontributin e tyre.
21 të rinjtë e përzgjedhur janë kryesisht të rinj që me nismat e tyre kanë fuqizuar komunitetet ku ata jetojnë, sidomos ato më të margjinalizuara, të rinj që kanë nxitur krijimin e lëvizjeve lokale apo kombëtare për mbrojtjen e mjedisit, kafshëve, fëmijëve, të rinjve, grave apo të moshuarve. /tesheshi.com/
