Kryeministri Edi Rama deklaroi sot se kryenegociatori i Shqipërisë me BE do të ishte mirë që të caktohej një person në bashkëpunim me opozitën. Rama i ka dhënë fund një debate të nisur në media mbi mundësinë që Majlinda Bregu, ish-deputete e PD-së, do të ishte në këtë pozicion, duke e cilësuar këtë situatë si të sponsorizuar me synimin që njerëzit që janë kritikë në partinë më të madhe të opozitës t´I trajtojnë si të afërt politikisht me kryeministrin.
“Unë nuk shoh asnjë diferencim. Është e gjithë një histori mediatike kjo. Komisioni i Integrimit ka qenë i opozitës, dhe do të jetë i opozitës. Përsëri opozita do të ketë të drejtë të zgjedhë kryetarin.
Natyrisht që lidhet me sponsorizimin që i bëhet një përpjekje për të goditur njerëzit që kanë patur qëndrime të ndryshme brenda PD-së. Kam parë goditje të çuditshme kundër Astrit Patozit, që s´do të thotë në këtë rast se unë po përkëdhel Astritin. Është e gjitha një flluskë për të shpikur historira.
Po e përsëris, ne në çështjen e integrimt duhet të kemi përfaqësues të opozitës dhe të bashkëpunojmë. Nuk e kemi zgjedhur ne Majlinda Bregun për përfaqësuese dhe as ka patur asnjë rast apo ndonjë plan imagjinar, ndonjë ide për të pasur Majlinda Bregun në qeveri”, tha Rama. /tesheshi.com/
