Divorci mes Edi Ramës dhe Koço Kokëdhimës duket se është një realitet politik në spektrin e zhvillimeve brenda Partisë Socialiste.
Pas deklaratës së ish-deputetit të Vlorës dhe ende kreut të PS-së për zonën e jugut të vendit kundër reformës në Drejtësi, duket se Koço ka prekur atë që Edi Rama e cilëson si “vijë e kuqe”.
Dhe në mënyrë të qartë dhe si kurrë ndonjëherë në këto 3 vjet, madje edhe më parë në opozitë, Edi Rama ka vizituar zonën e bregut pa Koço Kokëdhimën.
Dhe këtë e ka bërë në mënyrë të qartë për të demonstruar apo transmetuar një mesazh politik pas statusit të Kokëdhimës, i cili i afrohej qëndrimit të LSI-së.
Në facebook-un e tij, Rama ka postuar foto ku pranë ka vetëm kreun e bashkisë së Himarës Gjegji Goro, dhe si rrallë herë pranë tij nuk ndodhet as Kokëdhima e jo pa qëllim asnjë deputet tjetër i PS-së për Qarkun Vlorë, i cili kryesohet nga kreu i qeverisë.
Burime të tesheshi.com brenda mazhorancës bënë të ditur se Edi Rama ka shkuar këtë fundjavë në Himarë dhe Qeparo, fshatin e Koços, jashtë planit të përcaktuar.
Sipas një axhende të përgatitur shumë më parë, kryeministri, së bashku me një delegacion të madh, mes tyre dhe një shpurë ambasadorësh, do të zbarkonte në fshatrat e bregut për të hapur sezonin, ku normalisht mikpritësi i të gjithëve do të ishte ai që Berisha e ka quajtur “Komisari i Jugut”, pra Koço Kokëdhima, mandatin e deputetit të të cilit e ka hequr me një vendim të fundit Gjykata Kushtetuese.
Por gjithcka ka rrjedhur ndryshe pas statusit të disa ditëve më parë të Kokëdhimës, i cili e konsideronte “gabim të rëndë”, kalimin në seancë plenare të draftit të reformës në Drejtësi, pa miratimin e opozitës.
Kokëdhima theksonte se reforma në Drejtësi duhej miratuar me konsensus me opozitën dhe me këtë qëndrim ishte në rezonancë apo gjatësi vale me Ilir Metën dhe sulmuesin e tij të madh: Sali Berishën.
Por Edi Rama, duket nuk e ka duruar këtë qëndrim dhe ka ndërmarrë një aksion që quhet “demonstrim mesazhi”; pra ka shkuar në Himarë dhe fshatin e Kokëdhimës, Qeparo, pa Koçon, për të cilin vetëm disa muaj më parë tha publikisht se do të kalonin pleqërinë në zonën e Bregut.
Ramës, deklarata për “pleqërim me Koçon” i kushtoi jo pak, pasi pasoi sulmin e Berishës në mënyrën më të egër. Por kryeministri e bëri atë deklaratë si mesazh ndaj Gjykatës Kushtetuese, e cila duket se nuk i ka përfillur fare fjalët e koduara të Edi Ramës.
Por pas vendimit të Gjykatës Kushtetuese, Kokëdhima nuk u kursye ndaj sulmeve kundër eksponentëve t mazhorancës: Gramoz Ruçit në fillim, e më pas kundër Sajmir Tahirit dhe Erion Veliajt.
E qëndrimi i Koços pro LSI-së, siç duket është parë apo lexuar politikisht nga Rama si “thikë pas shpine” nga miku i tij i ngushtë, ndaj vendosi që t’i çojë një mesazh që tashmë rrugët e tyre janë të ndara. Dhe Himara apo Bregu nuk do ta ketë më Koçon “komisar” apo “bej” siç e cilësojnë kundërshtarët.
Duket se këto katër vjet për Edi Ramën po rezultojnë më traumatikë nga çfarë ishin parashikuar dhe më kontraversalët në marrëdhëniet me njerëzit brenda PS-së dhe koalicionit. /tesheshi.com/
