Edi Rama ka shpallur një plan të madh investimesh në 3 vitet e ardhshme në një shifër dukshëm të lartë.
Duke folur para Asamblesë së PS-së që po zhvillon punimet, Kryeministri Rama tha se “janë planifikuar 1 miliardë dollarë investime në tre vitet e ardhshme, në infrastrukturë, shkolla dhe objekte publike. Ky plan do të financohet me banka dhe kompani private. Ky nuk është një plan aventuror, por i koordinuar me organizmat e rëndësishme financiare botërore”.
Sipas Ramës me këto investime rritja ekonomike do të shkojë në shifrat e 7 përqindshit.
Kryeministri deklaroi në Asamble se, “reformat, sado me kosto, u kthyen në të ardhura që shkojnë te njerëzit në nevojë”.
“Nuk po kërkojmë që njerëzit të brohorasin Shqipërinë dhe nuk themi se po konkurrojmë me fuqitë e mëdha ekonomike, por jemi krenarë se reformat tona, sado me kosto, kthehen në të ardhura që shkojnë te njerëzit në nevojë. Nuk do të rrisnim rroga e pensione nëse nuk do të kishim bërë reformat e dhimbshme. Nuk ka rrugë tjetër sepse reformat, sa më shumë t’i shmangësh, aq më shumë e rëndon situatën”, deklaroi kreu i qeverisë dhe PS-së.
“Kemi humbur shumë kohë për të bërë gjëra që duheshin bërë vite më parë. Sot do të kishim sfida të tjera dhe realitet tjetër. E mbyllëm vitin qeverisës me një paketë solidariteti që na identifikon te njerëzit në nevojë si forcën e tyre përfaqësuese. Sot jemi në gjendje që të rrisim rrogat. Qysh ditën e parë hoqëm nga supet e shtresës së mesme dhe të varfër barrën e taksës së sheshtë 10%. Me këtë lëvizje u dhamë edhe 140 milionë dollarë të tjera familjeve”, shtoi Rama.
Kryeministri kujtoi edhe se qeveria ka marrë përsipër që të shlyejë “të gjitha detyrimet e prapambetura të përmbytjeve të shkuara” dhe se ka vënë në dispozicion “fondin për kompensimin kokë më kokë të çdo lope”, të prekur nga epidemia.
/tesheshi.com/
