Edi Rama ka shkarkuar Ilir Markon, njeriun e Ilir Metës në Ministrinë e Brendshme, i cili sot publikoi një sms dërguar Saimir Tahirit, ku Marko sulmonte ish-shefin e tij me fjalë nga më të rëndat.
Siç bëhet e ditur nga shkresa zyrtare e Kryeministrit, njeriu i LSI-së, që ka mbi 2 vjet si numri dy i ministrisë së Brendshme: “Per shkelje te papranueshme te etikes zyrtare, ne papajtueshmeri te plote me detyren e larte qe kryen dhe ne shkelje te normave me elementare te komunikimit publik, urdheroj shkarkimin nga posti i zv.ministrit te Puneve te Brendshme…”.
Ditën e sotme ka pasur një shkëmbim akuzash mes Saimir Tahirit dhe krerëve të lartë të LSI.
Në një postim në Facebook, Saimi Tahiri sulmoi ashpër Ilir Metën, i cili sipas tij ka tentuar ta përgjojë nëpërmjet zv.ministrit të Brendshëm Ilir Marko.
Pas kësaj Monika Kryemadhi, numri dy i LSI i është kthyer Tahirit me një shprehje bulevardi: “Mos pi mall, bëj palestër”! Kurse media pranë LSI publikuan një sms të Zv.ministrit të Brendshëm Ilir Marko drejtuar Saimir Tahirit, ku i thoshte se përgjimin nuk ia kishte bërë ai por shërbimet e huaja.
Në fakt, e vërteta është se shërbimet e huaja zbuluan çimkën e prodhimit kinez në zyrën e Ministrit të Brendshëm, ende pa bërë përgjimin e parë. /tesheshi.com/
