Edi Rama për herë të para ka folur për dy tentativat për të rrëzuar qeverinë e tij në 2016-n dhe 2017-n, operacion që u drejtua nga Ilir Meta, aktualisht President i Republikës.
Në një takim të fondacionit “Qemal Stafa”, një akademi politike e PS-së, Rama ka treguar se tentuan të rrëzonin qeverinë në mënyrë që reforma në drejtësi të ngecte.
“Nëse sot Shqipëria është më afër se asnjëherë momentit historik të çeljes së negociatave në BE, kjo i dedikohet PS-së që e mori në sy sfidën dhe rrezikun dhe që në një moment të caktuar rrezikoi të qeveriste për shkak të një përpjekje për të rrëzuar qeverinë. Sot sfida për ta bërë Shqipërinë është një sfidë e cila është qartësisht në dorën tonë sepse është një sfidë që kalon pikërisht përmes realizimit në terrenin e jetës së përditshme të kësaj reforme të pandalshme”, tha Rama.
Sipas tij ishte sonazhi që PS-ja bëri në popull , fakt i cili e bindi se mund të përballonte “puçin brenda mazhorancës”.
“Çfarë do vijë më tutje do të provojë se sa me vend është ambicia jonë dhe se sa me vend është mbështetja e 99% të shqiptarëve për këtë reformë, zbatimi i së cilës do të fillojë të ndajë në vitet në vijim politikanët që i shërbejnë vendit nga politikanët që vendin e duan si një mjet për ti shërbyer vetes. Do të ndajë politikanët që e luftojnë krimin dhe korrupsionin me gjithë mend nga politikanët që krimin dhe korrupsionin i kanë materie bazë për baltën e përditshme ndaj kundërshtarit. Do të ndajë Shqipërinë e të paprekshmëve dhe të gjithë pushtetshmëve nga Shqipëria e të gjithëve si të barabartë përpara ligjit”, tha Rama. /tesheshi.com/
