Në kulmin e përplasjes mes qeverisë dhe opozitës, Edi Rama ka firmosur një dokument ku i jep Lulzim Bashës meritën për hapjen e negociatave.
Sipas të gjitha gjasave, kyçi i këtij vlerësimi pozitiv është marrëveshja e 18 majit mes krerëve të PS-së dhe PD-së, ku të gjithë partitë e tjera të vogla e kundërshtuan pasi synonin që të mos hynin në zgjedhje me qeverinë e drejtuar nga kryeministri aktual.
Në një dokument të dorëzuar në Kuvend nga ana e qeverisë, marrëveshja Rama-Basha vendoset në krye të arritjeve.
E në fakt, pikërisht pas kësaj marrëveshjeje rinisi komisioni i vettingut dhe rifilloi procedura për vazhdimin e zbatimit të reformës në drejtësi.
Përveç kësaj, marrëveshja Rama-Basha sipas raportit ishte akti kyç për zhvillimin e zgjedhjeve më të qeta dhe pa problem, duke u cilësuar të tilla që prej shumë viteve.
Pra në këtë mënyrë është përmbushur kriteri thelbësor që BE ka për Shqipërinë: kriteri politik apo i ashtuquajturi “Kriteri i Kopenhagës”.
Ja ç’thotë dokumenti:
“Shumica qeverisëse është e përkushtuar për të bërë çdo përpjekje për të siguruar një dialog politik konstruktiv dhe për të ecur më tej mbi bazat e konsensusit politik që ekziston sa i përket integrimit evropian, në mënyrë që të vijojë ndjekjen e axhendës së reformave në një frymë kompromisi dhe bashkëpunimi. Shprehje e qartë e këtij përkushtimi ishte marrëveshja e 18 majit 2017, e cila i dha fund bojkotit të Parlamentit nga opozita dhe përmirësoi klimën politike.
Marrëveshja kontribuoi në zhvillimin e qetë të zgjedhjeve parlamentare në qershor 2017, me një proces elektoral gjithëpërfshirës dhe një fushatë më pak të polarizuar.
Parlamenti miratoi me konsensus mes forcave politike tri ligje të paketës së reformës në drejtësi. Si rezultat i klimës së përmirësuar politike, Parlamenti zgjodhi me konsensus (100 vota pro) anëtarët e tre institucioneve për rivlerësimin e figurës së gjyqtarëve dhe prokurorëve, hap thelbësor ky i reformës në drejtësi. Shqipëria u bë pjesë e projektit të BE – OSBE/ODIHR mbi reformën zgjedhore në vendet e Ballkanit Perëndimor. U miratua me konsensus në Parlament ligji për mbrojtjen e pakicave kombëtare”.
Zbatimi i ligjit të vettingut konsiderohet ndërkaq se është pika më e fortë për të bindur BE-në që të hapë dyert për Shqipërinë.
“Ka filluar zbatimi i elementit kyç të reformës në drejtësi – rivlerësimi i rreth 800 gjyqtarëve dhe prokurorëve (Veting). Institucionet e rivlerësimit u themeluan përmes një procedure përzgjedhjeje e cila mori në konsideratë rekomandimet e Operacionit Ndërkombëtar të Monitorimit. Parlamenti zgjodhi me konsensus mes palëve 12 komisionerët e Komisionit të Pavarur të Kualifikimit dhe 2 anëtarë zëvendësues; 2 Komisionerë Publikë dhe 2 zëvendësues, si edhe 7 gjyqtarë dhe 2 anëtarë zëvendësues të Dhomës së Apelit. Parlamenti ka miratuar strukturën organizative dhe pagat për stafin e institucioneve të Vetingut, ndërkohë që rekrutimet janë drejt përfundimit”, thuhet në raport.
Ndërkaq, në luftën ndaj korrupsionit duket se nuk ka shumë për të thënë.
Në raport: “qeveria flet vetëm për rritjen e numrit të referimeve nga policia në prokurori për korrupsion, por nuk thotë asgjë për dënime. “Zhvillimet legjislative në luftën kundër korrupsionit përfshijnë miratimin e amendamenteve në Kodin e Procedurës Penale, si dhe të ligjit për institucionet që luftojnë korrupsionin dhe krimin e organizuar, përmes së cilave vendoset krijimi i: një Prokurorie të specializuar, një Njësie Hetimi të pavarur, një Gjykate të specializuar. Ka vijuar trendi pozitiv drejt një bilanci të qëndrueshëm rezultatesh hetimi, ndjekjeje penale dhe dënimi të rasteve të korrupsionit, siç dëshmohet ndër të tjera nga rritja me 8.2% në numrin e rasteve të referuara në Prokurori nga policia në 6 mujorin e parë të 2017, krahasuar me të njëjtën periudhë të vitit paraardhës”.
Raporti duhet të miratohet në Kuvend që të mbërrijë në Bruksel përpara se Komisioni Europian të japë verdiktin e tij nëse mendon të hapë apo jo negociatat me Shqipërinë. Nëse Komisioni e merr vendimin, atëherë do të jetë më lehtë nga liderët e 27 vendeve anëtarë të thonë “OK”. /tesheshi.com/
