Kryeministri Edi Rama paralajmëroi nisjen e një operacioni kombëtar kundër rrjeteve kriminale. Nga Asamblea e PS-së, pasi ministrat prezantuan prioritetet e 100 ditëve të para, Rama me tone të prera tha se duhet një pastrim në të gjitha nivelet, nga ai në rrugë deri te nivelet më të larta të administratës.
“Të pastrohemi nga keqbërësit, jo vetëm në rrugë por edhe në administratë, zyra e shërbime, në të gjitha nivelet. Do të fillojmë me një lufte të hapur ndaj korrupsionit të trashëguar apo si kërcënim në vazhdim e pastrim strukturor përmes rindërtimit të të gjithë strukturës dhe mekanizmave të pushtetit ekzekutiv”, tha Rama.
Në lidhje me prioritetet e paraqitura nga ministrat, Rama tha se duhen specifikuar dhe se çfarë do të bëhet në vijim.
“Këtu u bë një pasqyrë e mirëdetajuar e ambicies për këto 100 ditë të para dhe do të nënvizoja faktin që në këtë periudhë duhet të përcaktojmë edhe të kalibrojmë shënjestrën për çeljen e negociatave për anëtarësim në BE për vitin që vjen, të përcaktojmë ecurinë e metejshme të këtyre 4 viteve për marrëdhëniet preferenciale dhe strategjike me Kosovën dhe rajonin, duhet të përcaktojmë kornizën brenda së cilës do të ngrihet procesi i regjistrimit të shqiptarëve jashtë atdheut në funksion të përfshirjes në vendimmarrje si janë zgjedhjet.
Duhet të vazhdojmë përpjekjet për t´u çliruar përditë, gjatë çdo dite nga barra e burokracisë e proçedurave, sorollatjeve ryshfeteve. Shërbimet konsullore do të pësojnë transformimin në këtë aspekt me 40% më pak barrë dokumentesh. Të lançojmë diplomacinë ekonomike si një qasje të re dhe funksion të ri në raport me ekonominë tonë nga shërbimi i jashtëm.
Të përcaktojmë kornizën e vetingut në Policinë e Shtetit për të hyrë deri në qelizë me një terapi agresive ndaj kancerit të inkriminimit të policisë në vite të tëra dhe të lançojmë operacionin kombëtar kundër rrjeteve kriminale si një fazë të dytë të operacionit kriminal që po mbyllet me sukses në ditët në vijim për çrrënjosjen e kanabisit nga toka jonë dhe harta e vendeve ku kultivohet lëndë narkotike”, tha Rama.
Në vijim ai shtoi se në misionin e qeverisë nuk do të ketë punësime me urdhra partie sikundër ka ndodhur.
“Nuk do të ketë asnjë emërim partie, asnjë masazhator apo këngëtar në burgje. As në hipoteka , ku ka qenë llumi”, tha ai. /tesheshi.com/
