Kryeministri Edi Rama deklaroi në një intervistë për Ilir Babaramon se u arrit të catohej vendi dhe ora e takimit me Lulzim Bashën, por ai ndryshoi mendje në momentin e fundit.
“Unë nuk e shoh opozitën të PD-së, as si flamuj e simbole; unë opozitën e shoh si frymë të lirisë dhe sa kohë ka liri për të zgjedhur, kurrë vendi nuk mbetet pa opozitë”, deklaroi Rama.
Rama komentoi edhe propozimin e LSI-së për dorëzimin e mandateve të saj për zgjidhjen e ngërçit. Ai tha se kjo është braktisje e detyrës dhe nuk e ndihmon situatën.
“Të thuash ne po ikim që t’i japim mundësi zgjidhjes, nuk është ta ndihmosh zgjidhjen, por është ta komplikosh; por unë nuk dua të besoj që kjo është e qëllimshme për ta komplikuar situatën. Për mua nuk është opsion braktisja e përgjegjësisë dhe hapja e një precedenti që do të ishte kthim shumë i madh prapa dhe do dëmtonte atë që është qëllimi: të bëjmë gjithçka për të çuar përpara reformat. Ne kemi detyrim të përbashkët si koalicion ndaj popullit që të çojmë mandatin deri ditën e fundit që të bëjmë punët për të cilat jemi ngarkuar”, tha Rama.
Ai shprehu më tej bindjen e tij se të gjithë do shkojnë në zgjedhje pavarësisht qëndrimeve të shprehura. Po ashtu, ai komentoi edhe qëndrimet e LSI-së si të ndryshme, por tha se kjo shihet si përpjekje për të kontribuuar në zgjidhjen e krizës.
“Natyrisht që qasja e tyre është e ndryshme, por unë qasjen e tyre e kam lexuar si përpjekje për të kontribuuar në zgjidhjen e krizës dhe jo kërcënim ndaj PS-së. Kështu që është një tentativë që unë e mirëkuptoj e si të tillë dhe nuk shoh asnjë arsye për të komentuar. Unë mendoj se në fund të ditës të gjithë do hyjnë në zgjedhje, kjo është bindja ime por nëse PD do të vrasë veten unë nuk e ndaloj dot”, tha Rama.
Kryeministri komentoi edhe thirrjet për dialog që sipas tij nuk kanë marrë përgjigje.
“Këtë problem të opozitës zyrtare, ose më saktë të PD-së dhe disa satelitëve të saj, unë nuk shoh se si ta zgjidhim veç diaologut. Unë kam bërë çdo ditë apel për dialog pa kushte”, tha më tej Rama.
Ai shtoi se ka pasur edhe kontakte mes palëve dhe u dakordësua një takim Rama-Basha, por më pas lideri i opozitës u tërhoq.
“U takuan personat e dy palëve, u caktua ora, vendi…Dhe në fund nuk u konfirmua kurrë. Duhet të pyesni Lulzim Bashën, pse ka frikë të ulet në tavolinë?”, tha Rama më tej. /tesheshi.com/
