Shtetasit shqiptarë me të drejtë vote që ndodhen jashtë kufijve të Shqipërisë do të regjistrohen duke filluar nga viti i ardhshëm. Kjo u bë e ditur nga kryeministri Edi Rama gjatë prezantimit të platformës për diasporën, ku gjithashtu ishin të pranishëm deputetë të LSI-së, por jo të PD-së.
“Vitin e ardhshëm jemi të gatshëm të kryejmë regjistrimin. 2018-ta i përkon me vitin e Skënderbeut, por në të gjitha rastet është një detyrë që ne e kemi marrë përsipër dhe jemi të angazhuar që t´a përmbushim vitin e ardhshëm në masën më të madhe”, tha Rama.
Në vijim ai shprehu një falenderim për përfaqësuesit e LSI-së që iu bashkuan tryezës, por shtoi se këtu duhet të ishin edhe përfaqësuesit e opozitës kryesore, PD-së, pasi për një çështje të tillë nuk ka qasje as të majta dhe as të djathta, por unifikuese kombëtare.
“Ministri ka bërë të mundur që në këtë tryezë të gjendet sot një dokument i rëndësishëm si pikënisje që ta çojmë përpara dhe ta mbyllim me sukses regjistrimin e plotë të të gjithë shqiptarëve ku ata jetojnë. Dua të falënderoj përfaqësuesit e LSI dhe nuk është sekret që me të njëjtën gatishmëri dhe sens të interesit të përbashkët të kishim këtu dhe përfaqësuesit e opozitës kryesore, PD, sepse kjo është një temë që s’ka qasje as majtas as djathtas, por qasje unifikuese kombëtare. Falënderoj përfaqësuesit e vendeve partnere që janë këtu dhe kam besim që eksperienca e shumëllojshme dhe e pasur e vendeve të përfaqësuara është një burim, që ne mund ta shfrytëzojmë në funksion të këtij procesi”, tha Rama.
Deputeti i LSI-së, Shezai Rrokaj, ndërsa ka vlerësuar dokumentin në fjalë, e cilësoi si më të plotin të paraqitur deri më tani.
“Më duhet të pohoj se është një dokument shumë i rëndësishëm dhe më duhet të komplimentoj ministrin dhe stafin që e ka punuar. Është më i plotë se çdo dokument tjetër që kemi patur deri më tani”, tha Rrokaj. /tesheshi.com/
